સ્વ. અભિનેત્રી શ્રીદેવી અને ફિલ્મ નિર્માતા બોની કપૂરની પુત્રી જહાન્વી કપૂર હવે ધીરે ધીરે સાઉથ ઇન્ડિયાની ફિલ્મ ઇન્ડસ્ટ્રીમાં પોતાનું સ્થાન મજબૂત બનાવી રહી છે. તેલુગુ ફિલ્મોમાં તેને હિન્દી કરતાં પણ વધુ ફી મળતી હોવાની ચર્ચા વચ્ચે, હવે તે તમિલ વેબ સીરિઝમાં પદાર્પણ કરવા જઈ રહી છે.
સૂત્રોના જણાવ્યા અનુસાર, તેણે નેટફ્લિક્સ માટે તમિલ ભાષાની એક વેબ સીરિઝ સાઇન કરી છે, જેના માટે તેને 20 કરોડ જેટલી માતબર ફી મળી છે. મહિલા કેન્દ્રિત વેબ સીરિઝનું દિગ્દર્શન જાણીતા ફિલ્મકાર પા રંજિત કરી રહ્યા છે, તેમણે સુપરસ્ટાર રજનીકાંત સાથે સતત બે ફિલ્મો ‘કબાલી’ અને ‘કાલા’નું નિર્માણ કર્યું હતું. તેમની તાજેતરની તેલુગુ ફિલ્મ ‘પેડ્ડી’, જેમાં રામ ચરણ સહ-અભિનેતા છે, તેના માટે જહાન્વીને 14 કરોડ જેટલી ફી મળી હોવાનું કહેવાય છે. આ સાથે તે અત્યાર સુધીની સૌથી વધુ ફી મેળવનારી તેલુગુ અભિનેત્રી બની ગઈ છે.
અગાઉ 2024માં રીલીઝ થયેલી ‘દેવરા’માં પણ જહાન્વીને મુખ્ય ભૂમિકાની ઓફર થઈ હતી, પરંતુ તેણે શરૂઆતમાં આ ઓફર ફગાવી હતી, કારણ કે તેને ચિંતા હતી કે પ્રાદેશિક સિનેમામાં કામ કરવાથી તેની બોલીવૂડની કારકિર્દી પર અસર થશે. પરંતુ બોની કપૂરે તેને આ ફિલ્મમાં કરવા માટે આગ્રહ કર્યો હતો અને તે પણ માતબર ફી લઇને. જહાન્વીને તે ફિલ્મ ચૂકવવામાં આવી હતી પરંતુ તે ફિલ્મ ખાસ સફળ થઇ નહોતી. પરંતુ જહાન્વીને સાઉથ ઇન્ડિયામાં પોતાનું સ્થાન મજબૂત બનાવવામાં મદદ મળી હતી.
