ટી-20 વર્લ્ડકપ-2026ની સુપર-8ની અમદાવાદમાં રવિવાર, 22 ફેબ્રુઆરીએ રમાયેલી મેચમાં ભારતનો દક્ષિણ આફ્રિકા સામે 76 રનને પરાજ્ય થયો હતો. આ ટુર્નામેન્ટમાં અત્યાર સુધી અજેય રહેલી ભારતીય ટીમને પ્રથમ વાર પરાજયનો સ્વાદ ચાખવો પડ્યો હતો. આ સાથે દક્ષિણ આફ્રિકાએ સુપર-8 મેચોની ત્રણ મેચમાંથી એક મેચ જીતી લીધી હતી, જ્યારે ભારત ત્રણ મેચોમાંથી એક મેચ ગુમાવી દીધી છે. જે ટીમ બે મેચ જીતશે તે સેમિફાઈનલમાં પહોંચી શકશે.
દક્ષિણ આફ્રિકાએ ટોસ જીતીને બેટિંગ પસંદ કરી હતી અને 20 ઓવરમાં સાત વિકેટે 187 રન નોંધાવ્યા હતાં, આ ટાર્ગેટના જવાબમાં ટીમ ઈન્ડિયા 18.5 ઓવરમાં 111 રનમાં ઓલઆઉટ થઈ ગઈ હતી. ડેવાલ્ડ બ્રેવિસ, ડેવિડ મિલર, ટ્રિસ્ટન સ્ટબ્સે દમદાર બેટિંગના કારણે ટીમ મજબૂત સ્કોર બનાવ્યો હતો. ઓપનિંગમાં આવેલા એડન માર્કરામ ચાર રને, ક્વિન્ટન ડી કોક 6 રને અને રયાન રિકેલટન માત્ર સાત રને આઉટ થયા હતાં. ડેવાલ્ડ બ્રેવિસ, ડેવિડ મિલર, ટ્રિસ્ટન સ્ટબ્સે આક્રમક બેટિંગ કરીને ટીમને મજબૂત સ્કોર સુધી લઈ ગઈ હતી. બ્રેવિસે 29 બોલમાં ત્રણ ફોર અને ત્રણ સિક્સ સાથે 45 રન, મિલરે 35 બોલમાં સાત ફોર અને ત્રણ સિક્સ સાથે 63 રન, જ્યારે સ્ટબ્સે 24 બોલમાં એક ફોર અને ત્રણ સિક્સ સાથે અણનમ 44 રન નોંધાવ્યા હતા. ભારત તરફથી જસપ્રીત બુમરાહે ત્રણ અને અર્શદીપ સિંહે બે વિકેટ લીધી હતી.
મેચમાં ભારતના ટોચના ત્રણ બેટરો સસ્તામાં આઉટ થયા બાદ વિકેટ પડવાનો સિલસિલો યથાવત્ રહ્યો હતો. શાન કિશન શૂન્ય રને, અભિષેક શર્મા 15 રને અને તિલક વર્મા માત્ર એક રને આઉટ થયો હતો. સુકાની સૂર્યકુમાર યાદવ 18 રને, વોશિંગ્ટન સુંદર 11 રને, શિવમ દુબે 42 રને, હાર્દિક પંડ્યા 18 રને, રિંકુ સિંઘ 0 રને, અર્શદિપ સિંહ 1, વરૂણ ચક્રવર્તી અણનમ શૂન્ય અને જસપ્રિત બુમરાહ શૂન્ય રને આઉટ થયો હતો.
સુપર-8 રાઉન્ડ માટે ભારત, દક્ષિણ આફ્રિકા, ઝિમ્બાબ્વે, વેસ્ટ ઈન્ડિઝ, ઈંગ્લેન્ડ, શ્રીલંકા, પાકિસ્તાન અને ન્યૂઝીલેન્ડે ક્વોલિફાય કર્યું છે. આ આઠ ટીમોને બે ગ્રુપમાં વહેંચવામાં આવી છે. દરેક ગ્રુપની ટીમો પરસ્પર એક-એક મેચ રમશે અને ટોપ-2 ટીમો સેમિફાઈનલમાં પહોંચશે.
