1950ના દાયકામાં કેન્યામાં માઉ માઉ ચળવળ દરમિયાન બળવાખોરો પર બ્રિટનના સૈનિકો દ્વારા ગુજારવામાં આવેલા અત્યાચાર અને ત્રાસનો આ મહિનામાં કેન્યાની મુલાકાત લેનાર કિંગ ચાર્લ્સ દ્વારા સ્વિકાર કરવામાં આવશે કે કેમ તેની અટકળો તેજ થઇ રહી છે.
પ્રથમ કોમનવેલ્થ સ્ટેટ વિઝીટ અંતર્ગત રાણી સાથેની ચાર-દિવસીય મુલાકાતમાં રાજા કેન્યામાં બ્રિટનના ઈતિહાસના “વધુ પીડાદાયક પાસાઓ”ને ઓળખશે. તેમનો હેતુ ઇસ્ટ આફ્રિકન સાથી સાથે યુકેના સંબંધને મજબૂત બનાવવાનો છે.
કિકુયુ જનજાતિના કેટલાક સભ્યોએ તેમના બ્રિટિશ શાસકો, કેન્યામાં જમીન પર ખેતી કરતા યુરોપિયન વસાહતીઓ અને રાજકીય પ્રતિનિધિત્વના અભાવ પ્રત્યે રોષ ધરાવે છે.
હિંસક હુમલામાં શ્વેત ખેડૂતોને તેમજ કેટલાક કિકુયુને નિશાન બનાવાયા હતા. કેન્યા હ્યુમન રાઈટ્સ કમિશને જણાવ્યું હતું કે બ્રિટિશ વહીવટીતંત્ર વિરોધી બળવાખોરી દરમિયાન કેન્યાના 90,000 લોકોને ફાંસી આપવામાં આવી હતી, ત્રાસ આપવામાં આવ્યો હતો અથવા અપંગ કરવામાં આવ્યા હતા.
મનાય છે કે રાજા શાહી પરિવારના પ્રથમ સભ્ય તરીકે આ ત્રાસને સ્વીકારશે. આ મુલાકાત યુકે અને કેન્યાના સહિયારા ઇતિહાસના વધુ પીડાદાયક પાસાઓને પણ સ્વીકારશે, જેમાં 1952 થી 1960 સુધીની કટોકટીનો સમાવેશ થાય છે.
ચાર્લ્સ અને કેમિલા કેન્યાના ઈતિહાસને સમર્પિત નવા મ્યુઝિયમની મુલાકાત લેશે જ્યાં માઉ માઉ વિદ્રોહની વાર્તા એક અભિન્ન ભાગ હશે. તેઓ નૈરોબીમાં અજાણ્યા યોદ્ધાની કબર પર પુષ્પાંજલિ પણ અર્પણ કરશે અને કેન્યાની સ્વતંત્રતાની ઘોષણા સ્થળની મુલાકાત લેશે.
2013 માં, લાંબી કાનૂની લડાઈ પછી, યુકે સરકાર માઉ માઉ બળવા દરમિયાન ત્રાસ પામેલા કેન્યાવાસીઓને વળતરમાં લગભગ £14 મિલિયન ચૂકવવા સંમત થઈ હતી.
તે સમયે ફોરેન સેક્રેટરી વિલિયમ હેગે કહ્યું હતું કે “બ્રિટિશ સરકાર નિષ્ઠાપૂર્વક ખેદ વ્યક્ત કરે છે કે આ દુર્વ્યવહાર થયો હતો અને તેણે કેન્યાની સ્વતંત્રતા તરફની પ્રગતિને નુકસાન પહોંચાડ્યું હતું. ત્રાસ અને દુર્વ્યવહાર એ માનવીય ગૌરવનું ઘૃણાસ્પદ ઉલ્લંઘન છે જેની અમે નિંદા કરીએ છીએ.”
આ મુલાકાત કેન્યા સાથે બ્રિટનની “મજબૂત ભાગીદારી” ને આગળ વધારશે, જેમાં વેપાર, સુરક્ષા અને આબોહવા પરિવર્તનનો સમાવેશ થાય છે.
કિકુયુ જનજાતિના લોકોમાંથી ઘણા તેમના પૂર્વજોની જમીનોમાંથી વિસ્થાપિત થયા હતા. 1952માં તેમણે અંગ્રેજોને વફાદાર લોકો તેમજ ગોરા વસાહતીઓ પર ગેરિલા હુમલાઓ કરવાનું શરૂ કર્યું. સંઘર્ષના અંત સુધીમાં કુલ 32 યુરોપિયન નાગરિકો માર્યા ગયા હતા. પરંતુ કિકુયુ આ હિંસાનો વધુ ભોગ બન્યા હતા. લારી ગામ પર માઉ માઉ હુમલાના પરિણામે 84 કિકુયુ નાગરિકોની કતલ થઈ હતી, જેમાં મોટાભાગની મહિલાઓ અને બાળકો હતા.
જો કે, બ્રિટિશ સંસ્થાનવાદી સરકારનો પ્રતિભાવ ગંભીર અને લોહિયાળ હતો. 1952માં એક વફાદાર કિકુયુ ચીફની હત્યા બાદ, કટોકટીની સ્થિતિને કારણે એક વિરોધી બળવો શરૂ થયો હતો. સત્તાવાર રીતે 10,000 માઉ માઉ અને 2,000 નાગરિકો મૃત્યુ પામ્યા હતા. બ્રિટિશ બાજુએ 3,000 જાનહાનિ થઈ હતી. અન્ય લોકોએ મૃત્યુઆંક 25,000 પર મૂક્યો હતો.
