ઓસ્કાર વિજેતા સંગીતકાર એ આર રહેમાન હવે અભિનેતા બનશે. મનોજ એનએસ દિગ્દર્શિત ફિલ્મ ‘મૂન વોક’માં રહેમાન અભિનય કરશે, તેમાં પ્રભુદેવા પણ જોવા મળશે. રહેમાન એક કાલ્પનિક પાત્ર ભજવશે. તાજેતરમાં ફિલ્મના મેકર્સે અલગ અલગ 14 પાત્રોના પોસ્ટર લોંચ કર્યા હતા, જેના પરથી તેની મોટી કાસ્ટનો પણ અંદાજ આવે છે.
ખાસ વાત તો એ છે કે આ ફિલ્મમાં રહેમાને એક્ટિંગની સાથે જ પ્રથમવાર આ ફિલ્મ માટે તમામ પાંચ ગીતોમાં સ્વર આપ્યો છે. આ ફિલ્મમાં રહેમાન એંગ્રી યંગ ફિલ્મ ડાયરેક્ટરની ભૂમિકા ભજવશે.
આ અંગે દિગ્દર્શક મનોજ એનએસે જણાવ્યું હતું કે, ‘પ્રભુ દેવા સર અને રહેમાન સાથે માયલી ગીત શૂટ કરવામાં અમને ઘણી મજા પડી હતી. આ ગીત ઘણું સારું બન્યું છે અને થિએટરમાં દર્શકોને તે જોવાની ઘણી મજા આવશે. આ ગીત માટે પ્રભુ દેવા સરે તેમની કારકિર્દીનું સૌથી સારું પર્ફોર્મન્સ આપ્યું છે, આ ગીતને ખાસ બનાવવા માટે હું કોરિયોગ્રાફર શેખર માસ્ટરનો પણ આભારી છું. એ આર રહેમાન આ આખા ગીતમાં જોવા મળશે, એ આ ગીતને અલગ બનાવે છે.
આ ગીત પછી મેં જ્યારે તેમને એક લાંબો રોલ ઓફર કર્યો તો એમણે ખુશીથી સ્વીકારી લીધો. આ સીન ફિલ્મના દર્શકો માટે સરપ્રાઇઝ બની રહેશે.’ આ ફિલ્મમાં પ્રભુદેવા યુવાન ફિલ્મ કોરિયોગ્રાફર બાબુટ્ટીના રોલમાં દેખાશે, જે પર્ફોર્મન્સની સાથે કોમેડી કરતા પણ જોવા મળશે. આ ફિલ્મની કાસ્ટમાં યોગીબાબુ પણ છે. તેમના સિવાય અજુ વર્ગીઝ, અર્જૂન અસોકન, સેટ્ઝ, સુશ્મિતા, નિશ્મા, સ્વામીનાથન, રેડીન કિંગ્સ્લે, રાજેન્દ્રન, દીપા અક્કા, સંતોષ જેકોબ અને રાજકુમાર પણ છે. આ ફિલ્મને મે, 2026માં રિલીઝ કરવાની યોજના છે.
