રશિયાના રાષ્ટ્રપતિ વ્લાદિમીર પુતિને મંગળવારે જણાવ્યું કે, તેઓ એ કાયદાનું સમર્થન કરશે જેના લાગુ થવાથી તેમને 2024માં રાષ્ટ્રપતિ તરીકે પાંચમી વખત કાર્યકાળ સંભાળવા માટે મંજૂરી મળશે. મંગળવારે રશિયાની સંસદના નીચલા ગૃહમાં 27 વર્ષ જૂના બંધારણમાં બદલવા માટેનો પ્રસ્તાવ લાવવામાં આવ્યો છે. જો આ પ્રસ્તાવ પસાર થઈ જશે તો પુતિન 2036 સુધી રશિયાના રાષ્ટ્રપતિ પદે યથાવત્ રહેશે. 67 વર્ષીય પુતિને વર્ષ 2000માં પ્રથમ વખત રશિયાના રાષ્ટ્રપતિનું પદ સંભાળ્યું હતું ત્યારથી તેઓ સતત સત્તા પર છે.
કાયદાના નિષ્ણાતો સાથે વાત કર્યા બાદ પુતિન સંસદના નીચલા ગૃહ ડ્યૂમામાં આ પ્રસ્તાવ લઈને આવ્યા છે. પુતિને જણાવ્યું છે કે તેમના મતે તેમણે રશિયાની સ્થિરતા માટે ફરીથી સત્તામાં આવવું જોઈએ. ડ્યૂમામાં યુનાઈટેડ રશિયા પાર્ટીની પાસે બહુમતિ છે તેથી માનવામાં આવી રહ્યું છે કે આ પ્રસ્તાવ પસાર થઈ જશે. જો આ પ્રસ્તાવ પસાર થઈ જાય છે તો પુતિનને છ-છ વર્ષ માટે વધુ બે કાર્યકાળ પૂર્ણ કરવાની તક મળશે. પુતિનનો કાર્યકાળ 2024માં સમાપ્ત થશે. પુતિને જણાવ્યું છે કે, રાષ્ટ્રપતિ દેશની સુરક્ષા, આંતરિક સ્થિરતા અને વિકાસવાદી સ્થિરતા માટે જવાબદાર હોય છે.
