બાંગ્લાદેશમાં બાંગ્લાદેશ નેશનાલિસ્ટ પાર્ટી (બીએનપી)ના વડા તારિક રહેમાનને મંગળવાર 17 ફેબ્રુઆરીએ દેશના વડાપ્રધાન તરીકે શપથ લીધા હતાં. આ શપથગ્રહણ સમારોહ બંગભવનને બદલે સંસદ સંકુલના દક્ષિણ પ્લાઝામાં રાખવામાં આવ્યો હતો. દેશના રાષ્ટ્રપ્રમુખ મોહમ્મદ શહાબુદ્દીન કેબિનેટના પ્રધાનોને શપથ લેવાડ્યાં હતાં. ભારત તરફથી લોકસભા અધ્યક્ષ ઓમ બિરલા આ સમારોહમાં હાજરી આપી હતી. 17 વર્ષના લંડન રહ્યાં પછી પરત ફરેલા 60 વર્ષીય તારિક રહેમાને ‘રાષ્ટ્રીય એકતા’ અને ‘શાંતિ’ પર ભાર મૂક્યો છે.
રહેમાનની સાથે 25 કેબિનેટ અને 24 રાજ્યકક્ષાના પ્રધાનોએ પણ શપથ લીધા હતાં. નવી કેબિનેટમાં લઘુમતી સમુદાયના બે સભ્યોનો સમાવેશ કરાયો હતો, જેમાં હિન્દુ ધર્મના BNP ઉપપ્રમુખ નિતાઈ રોય ચૌધરી અને બૌદ્ધ ધર્મના દિપેન દિવાનનો સમાવેશ થાય છે.
ભૂતપૂર્વ વડાપ્રધાન ખાલિદા ઝિયા અને ભૂતપૂર્વ પ્રેસિડન્ટ ઝિયાઉર રહેમાનના પુત્ર 60 વર્ષીય રહેમાને રાજકીય સ્થિરતા પુનઃસ્થાપિત કરવા, રોકાણકારોનો વિશ્વાસ પુનઃનિર્માણ કરવા જેવા પડકારોનો સામનો કરવો પડશે. આની સાથે 2024માં શેખ હસીનાની સરકારને ઉથલાવી પાડતા જનરલ ઝીની આગેવાની હેઠળના બળવા પછી લાંબા સમય સુધી ચાલી રહેલી ઉથલપાથલનો પણ અંત લાવવો પડશે.
તાજેતરમાં યોજાયેલી 13મી સંસદીય ચૂંટણીમાં તારિક રહેમાનની પાર્ટી બાંગ્લાદેશ નેશનાલિસ્ટ પાર્ટી (બીએનપી)એ 297માંથી 209 બેઠકો મેળવીને પ્રચંડ વિજય હાંસલ કર્યો હતો. 68 બેઠકો જીતનાર કટ્ટરવાદી પક્ષ જમાત-એ-ઇસ્લામી હવે રચનાત્મક વિપક્ષની ભૂમિકા ભજવશે. શેખ હસીનાની અવામી લીગને આ ચૂંટણી લડવા પર પ્રતિબંધ હતો.
અગાઉ ઢાકામાં રાષ્ટ્રીય સંસદ ભવન ખાતે નવા ચૂંટાયેલા સાંસદોએ શપથ લીધા બાદ યોજાયેલી BNP સંસદીય પક્ષની બેઠકમાં રહેમાનને ઔપચારિક રીતે બાંગ્લાદેશના આગામી વડાપ્રધાન તરીકે ચૂંટવામાં આવ્યાં હતાં.
રહેમાન 35 વર્ષમાં પ્રથમ વાર બાંગ્લાદેશના પુરુષ વડાપ્રધાન બન્યાં હતાં. સત્તામાં તેમનું આગમન બાંગ્લાદેશી રાજકારણમાં એક એવા યુગનો અંત દર્શાવે છે જેમાં ફક્ત બે મહિલાઓ એટલે કે તેમની માતા ખાલિદા ઝિયા અને લાંબા સમયથી હરીફ શેખ હસીનાનું વર્ચસ્વ રહ્યું હતું.
