અમેરિક-ઇઝરાયેલ અને ઇરાન વચ્ચે મિડલ ઇસ્ટમાં ભીષણ યુદ્ધની અસર બોલીવૂડ પર પણ પડી છે. આ યુદ્ધને કારણે કેટલાક નિર્માતાઓએ પોતાની નવી ફિલ્મોને ત્યાં રિલીઝ કરવાનું હાલમાં મોકૂફ રાખ્યું હોવાનું કહેવાય છે. મધ્ય-પૂર્વીય દેશો હિન્દી ફિલ્મો માટે ખૂબ મહત્વનાં હોવાથી યુદ્ધનું સંકટ આ બોલીવૂડ પર જોવા મળી રહ્યું છે.
કિયારા અડવાણી, નયનતારા, હુમા કુરેશી, તારા સુતારિયા અને સાઉથ ઇન્ડિયન સુપરસ્ટાર યશ અભિનિત ફિલ્મ “ટોક્સિક: અ ફેરી ટેલ ફોર ગ્રોન-અપ્સ” માટે દર્શકોએ થોડી રાહ જોવી પડશે. મધ્ય પૂર્વમાં ચાલી રહેલા યુદ્ધ અને ત્યાંના વિવિધ દેશોમાં નોંધપાત્ર અનિશ્ચિતતાને કારણે નિર્માતાઓએ ફિલ્મની રિલીઝ મુલતવી રાખવાનો મહત્વપૂર્ણ નિર્ણય લીધો છે.
ફિલ્મના નિર્માતાઓ, KVN પ્રોડક્શન્સ અને મોન્સ્ટર માઇન્ડ ક્રિએશન્સે જણાવ્યું હતું કે, અખાતી દેશો તેમની ફિલ્મ માટે એક મુખ્ય બજાર છે. ત્યાં ચાલી રહેલા યુદ્ધને કારણે તેમને વૈશ્વિક દર્શકો સુધી પહોંચવામાં અડચણો આવી છે.
આ ફિલ્મના નિર્માતાઓની સત્તાવાર જાહેરાત મુજબ, આ ફિલ્મ હવે 4 જૂન, 2026 ના રોજ વિશ્વભરમાં રિલીઝ થવાની છે. નિર્માતાઓએ લખ્યું, “ટોક્સિક: અ ફેરી ટેલ ફોર ગ્રોન-અપ્સ એ એક ફિલ્મ છે જેનો અમે વૈશ્વિક પ્રેક્ષકો માટે સિનેમા બનાવવાના વિઝન સાથે વિચાર કર્યો છે. વિશ્વભરના પ્રેક્ષકો સાથે જોડાવાના મક્કમ હેતુ સાથે કન્નડ અને અંગ્રેજીમાં આ ફિલ્મ બનાવવામાં આવી છે.
વર્ષોની સખત મહેનત પછી, અમે 19 માર્ચે તમારી સાથે અમારી ફિલ્મને રજૂ કરવા માટે ઉત્સાહિત છીએ. જો કે, ખાસ કરીને મધ્ય પૂર્વમાં, વર્તમાન અનિશ્ચિતતાએ એવી પરિસ્થિતિ ઊભી કરી છે જે વ્યાપક પ્રેક્ષકો સુધી પહોંચવા અને તેમની સાથે જોડાવાના અમારા લક્ષ્યને અસર કરી રહી છે.
તેથી, અમારા ભાગીદારો અને અમારા પ્રેક્ષકોના શ્રેષ્ઠ હિતમાં, અમે અમારી રિલીઝ ફરીથી શેડ્યૂલ કરવાનો મુશ્કેલીભર્યો, પરંતુ સમજી વિચારીને નિર્ણય લીધો છે. અમે તમારા સહકાર અને ધીરજ બદલ આભાર માનીએ છીએ. ગીતુ મોહનદાસ દ્વારા દિગ્દર્શિત આ ફિલ્મ હવે 4 જૂનના રોજ વિશ્વભરના થિયેટરોમાં અંગ્રેજી અને ભારતીય ભાષાઓમાં રિલીઝ થશે.”
