અમેરિકન પ્રેસિડન્ટ ડોનાલ્ડ ટ્રમ્પે જાણીતી ચાઇનીઝ શોર્ટ વીડિયો એપ ટિકટોકના અમેરિકા યુનિટના વેચાણ માટે મંજૂરી આપી હતી. ટિકટોકના અમેરિકન યુનિટનું વેચાણ સ્થાનિક વૈશ્વિક રોકાણકારોને કરાશે અને તેનું મૂલ્ય અંદાજે 14 બિલિયન ડોલર આંકવામાં આવ્યું છે. હવે ડેલ ટેકનોલોજીના સ્થાપક માઇકલ ડેલ અને ફોક્સ કોર્પના ચેરમેન ઇમેરિટસ રુપર્ટ મર્ડોક કે અન્ય ચાર-પાંચ મોટા રોકાણકારો તેને ખરીદે તેવી સંભાવના છે. ટિકટોક અમેરિકા અને ચીન વચ્ચેનો એક લાંબા વિવાદનું કારણ છે. ટ્રમ્પ ઘણીવાર તેને રાષ્ટ્રીય સુરક્ષા માટે ખતરો જાહેર કરી ચુક્યા છે. ટ્રમ્પે આ એપ પરના પ્રતિબંધ મુકતા કાયદાના અમલને 20 જાન્યુઆરી સુધી મોકૂફ રાખ્યો હતો. જોકે આ ડીલના ભાગરુપે ચીની કંપનીએ તેના અમેરિકાના યુનિટને અલગ કરીને તેનું વેચાણ કરવું પડશે. અમેરિકાના વાઇસ પ્રેસિડન્ટ જે ડી વેન્સે ઓવલ ઓફિસમાં જણાવ્યું હતું કે, ચીન તરફથી થોડી અડચણ ઊભી થઇ પ્રતિકાર થયો હતો, પરંતુ અમે ટિકટોકને કાર્યરત રાખવા ઇચ્છતા હતાં, પરંતુ અમે અમેરિકનોના ડેટાની ગોપનીયતા જળવાઈ રહે તે સુનિશ્ચિત કરવા ઇચ્છતા હતાં. ટ્રમ્પના આદેશ મુજબ અમેરિકન કંપનીના ભાગીદારો અલ્ગોરિધમને પર દેખરેખ રાખશે અને અલ્ગોરિધમનું સંચાલન નવા સંયુક્ત સાહસના નિયંત્રણ હેઠળ રહેશે. ટ્રમ્પે દાવો કર્યો હતો કે ચીનના પ્રેસિડન્ટ શી જિનપિંગે આ યોજનાઓને મંજૂરી આપવાનો સંકેત આપ્યો છે. ટ્રમ્પે ગત વર્ષે ફરીથી ચૂંટણી જીતવામાં મદદ કરવા બદલ ટિકટોકને શ્રેય આપ્યો છે. અમેરિકામાં આ એપના યુઝર્સની સંખ્યા 17 કરોડ છે. ટ્રમ્પના અંગત ટિકટોક એકાઉન્ટ પર 1.5 કરોડ ફોલોઅર્સ છે. વ્હાઇટ હાઉસે પણ ગયા મહિને એક સત્તાવાર ટિકટોક એકાઉન્ટ પણ શરૂ કર્યું હતું.
