યુકેના ભૂતપૂર્વ વડાપ્રધાન રિશિ સુનક અને યુકેના નાયબ વડાપ્રધાન ડેવિડ લેમી તાજેતરમાં નવી દિલ્હીમાં બ્રિટિશ હાઈકમિશનના એક કાર્યક્રમમાં મંચ પર સાથે ઉપસ્થિત હતા. ત્યાં તેમણે રમૂજ, તેમના બંનેના વારસા અને આર્ટિફિશિયલ ઇન્ટેલિજન્સ સંબંધિત ચર્ચા કરી હતી. રિશિ સુનકનો પરિચય કરાવતા લેમીએ કહ્યું, ‘હું જાણું છું કે ભૂતપૂર્વ વડાપ્રધાન રિશિ સુનક માત્ર યુકેના જ નહીં પરંતુ ભારતના પણ મહાન પુત્ર છે.’ આ સાંભળીને સુનકે તરત જ વચ્ચે વાત તોડતાં કહ્યું કે, ‘જમાઈ’, આ સાંભળીને ત્યાં ઉપસ્થિત લોકોમાં હાસ્યનું મોજું ફરી વળ્યું હતું, લેમીએ પણ તેમને ‘જમાઈ!’ તરીકે સંબોધન કર્યું હતું. યુકેના નાયબ વડાપ્રધાન ડેવિડ લેમીએ પણ પોતાના ભારતીય વારસાનો ઉલ્લેખ કરીને જણાવ્યું હતું કે, તેમનાં માતાનાં દાદી કલકત્તાના હતા, અને તેમણે યુકેના ભૂતપૂર્વ વડાપ્રધાન રિશ સુનક સાથેની તેમની મિત્રતાની પ્રશંસા કરી હતી. લેમીએ તેમના પોતાના ભારત સાથેના સંબંધ પર ભાર મૂકતા જણાવ્યું હતું કે, ‘હું પણ માત્ર મારા વારસાને સ્થાપિત કરવા ઇચ્છું છું, કારણ કે મારી માતાના દાદી કલકત્તાના હતા.’ લેમીએ તેમની વચ્ચે રાજકીય મતભેદો હોવા છતાં સાથે મળીને કામ કરવાની તેમની ક્ષમતાને મહત્ત્વ આપીને યુકે અને વૈશ્વિક કક્ષાએ સમાન લક્ષ્યો પર કામ કરવા અંગે ભાર મુક્યો હતો.
