અમેરિકામાં પ્રેસિડન્ટ ડોનાલ્ડ ટ્રમ્પને આંચકારૂપ એક ચુકાદામાં દેશની સુપ્રીમ કોર્ટે ઇન્ટરનેશનલ ઇમર્જન્સી ઇકોનોમિક પાવર એક્ટ (IEEPA) અંતર્ગત જુદા જુદા દેશો પર લાદેલા ટેરિફને 20 ફેબ્રુઆરીના રોજ રદ્દ કર્યા હતા. 6/3 બહુમતીના ચુકાદામાં સુપ્રીમ કોર્ટે જણાવ્યું હતું કે, આ એક્ટ મુજબ, ટેક્સ અને ટેરિફ લાદવાનો અધિકાર ફક્ત કોંગ્રેસ પાસે છે, પ્રેસિડન્ટ પાસે નહીં. કોર્ટના આ ચુકાદા બાદ ઉગ્ર રોષે ભરાયેલા ટ્રમ્પે વિશ્વના તમામ દેશો પર વધારાના 10 ટકા ટેરિફ લાદ્યા હતા. ન્યાયમૂર્તિ સેમ્યુઅલ એલિટો, ક્લેરેન્સ થોમસ અને બ્રેટ કેવનોએ આ ચુકાદા સાથે અસંમતિ વ્યક્ત કરી હતી.
જોકે, આ ચુકાદામાં બીજા કાયદા હેઠળ ડ્યૂટી લાદતા ટ્રમ્પને અટકાવ્યા નથી. એડમિનિસ્ટ્રેશનના ઉચ્ચ અધિકારીઓએ પણ કહ્યું હતું કે, તેઓ અન્ય સત્તા અંતર્ગત ટેરિફનું માળખું યથાવત રાખશે. સુપ્રીમ કોર્ટના ચુકાદા પહેલા ટ્રમ્પે જણાવ્યું હતું કે, જો તેમની વિરુદ્ધ ચુકાદો આવશે તો દેશ આર્થિક રીતે બરબાદ થઈ જશે. બંધારણ મુજબ કોંગ્રેસને ટેરિફ લાદવાની સત્તા મળે છે. પરંતુ તંત્રે દલીલ કરી હતી કે, ઇમર્જન્સી દરમિયાન આયાતનું નિયમન કરવાની છૂટ આપતા આ કાયદા હેઠળ પ્રેસિડન્ટ ટેરિફ લાદી શકે છે. ભૂતકાળમાં પણ બીજા પ્રેસિડેન્ટ દ્વારા બીજા દેશો પર પ્રતિબંધ લાદવા માટે આ કાયદાનો ઉપયોગ થયો છે.
સુપ્રીમ કોર્ટના ચુકાદા બાદ ટ્રમ્પે પત્રકારોને સ્પષ્ટ કહ્યું હતું કે, અન્યાયી વ્યાપારિક પદ્ધતિથી અમેરિકાનું દસકાઓથી શોષણ કરી રહેલા દેશોને અટકાવવામાં આવ્યા છે અને અમેરિકાના અર્થતંત્રમાં સેંકડો બિલિયન ડોલર આવી રહ્યા છે. ટેરિફ મામલે પીછેહઠને અમેરિકા માટે નુકસાનકારક ગણાવીને ટ્રમ્પે જાહેરાત કરી હતી કે, પ્રેસિડેન્ટ તરીકે ટેરિફ લાદવાની સત્તા તેમની પાસે જ છે.
