મેક્સિકોમાં રવિવારે એક મિલિટરી ઓપરેશનમાં અલ મેન્ચો તરીકે ઓળખાતા કુખ્યાત ડ્રગ માફિયા નેમેસિયો ઓસેગુએરાને ઠાર કરાયાના થોડા કલાકમાં દેશભરમાં વ્યાપક હિંસા ફાટી નીકળી હતી. આ ડ્રગ્સ માફિયાના સમર્થકો ગણાતા બંદૂકધારીઓએ અનેક રાજ્યોમાં હાઇવે બ્લોક કરી દીધા હતાં તથા કાર અને દુકાનોને આગ ચાંપી દીધી હતી. અડધા ડઝનથી વધુ રાજ્યોમાં હિંસા ફાટી નીકળી હતી. અમેરિકા, કેનેડા, ભારત સહિતના દેશોએ ટ્રાવેલ એડવાઇઝરી જારી કરી હતી.
અલ મેન્ચો મેક્સિકોની સૌથી શક્તિશાળી ડ્રગ્ર કાર્ટેલ જેલિસ્કો ન્યૂ જનરેશન કાર્ટેલનો વડો હતો. તેને દેશના સૌથી હિંસક ગુનેગારોમાંના એક ગણવામાં આવે છે. અમેરિકાએ તેના માથા માટે $15 મિલિયનનું ઇનામ જાહેર કર્યું હતું.
હિંસાને પગલે કેટલાક શહેરોમાં પ્રવાસીઓ અને રહેવાસીઓને ઘરની અંદર રહેવાની અપીલ કરાઈ હતી. રવિવારે એર કેનેડા, યુનાઇટેડ એરલાઇન્સ અને એરોમેક્સિકો સહિત અનેક એરલાઇન્સે દરિયા કિનારાના રિસોર્ટ શહેર પ્યુઅર્ટો વલ્લર્ટાની ફ્લાઇટ્સ રદ કરી હતી. શહેરમાં પણ અનેક સ્થળો પર આગચંપી કરાઈ હતી આકાશમાં ધુમાડાના ગોટેગોટા ઉડતા જોવા મળ્યાં હતાં.
ઓસેગુએરાના જાલિસ્કો ન્યૂ જનરેશન કાર્ટેલના એક સભ્યે જણાવ્યું હતું કે ઓસેગુએરાની સરકાર દ્વારા હત્યાના બદલો લેવા આગચંપી અને ગોળીબાર કરવામાં આવ્યા હતા. આ સંગઠને રક્તપાત થવાની ચેતવણી આપી હતી.
મેક્સિકોની આર્મીએ રવિવારે અલ મેન્ચોને એન્કાઉન્ટરમાં ઠાર કર્યો હોવાની જાહેરાત કરી હતી. અમેરિકન ગુપ્તચર એજન્સીઓની ચોક્કસ બાતમીના આધારે મેક્સિકન સ્પેશિયલ ફોર્સે જલિસ્કોના તપાલપામાં આ ઓપરેશન હાથ ધર્યું હતું. આ અથડામણમાં અલ મેન્ચો ઉપરાંત 6 શંકાસ્પદ કાર્ટેલ ગનમેનના મોત થયા હતાં. ઘાયલ હાલતમાં અલ મેન્ચોને મેક્સિકો સિટી લઈ જતી વખતે રસ્તામાં જ તેનું મોત નીપજ્યું હતું.
અમેરિકન પ્રમુખ ડોનાલ્ડ ટ્રમ્પ મેક્સિકો પર ફેટાનાઇલ ડ્રગ્સની તસ્કરી રોકવા માટે ભારે દબાણ કરી રહ્યા છે ત્યારે આ મિલિટરી ઓપરેશન હાધ ધરાયું હતું.
