ઓવલમાં સોમવારે પુરી થયેલી ભારત-ઈંગ્લેન્ડની અંતિમ ટેસ્ટ મેચ અને સીરિઝમાં ભારતીય ફાસ્ટ બોલર મોહમ્મદ સિરાજે તેની ટેસ્ટ કારકિર્દીમાં અનેક મોટી સિદ્ધિ નોંધાવી હતી. તે લંડનના ઓવલ ક્રિકેટ ગ્રાઉન્ડ પર ઇંગ્લેન્ડ સામે 100 વિકેટ ઝડપી ભારતનો 7મો ફાસ્ટ બોલર બન્યો હતો. સિરાજે પાંચ મેચની ટૂર્નામેન્ટમાં સૌથી વધુ, 23 વિકેટ ઝડપી હતી.
મોહમ્મદ સિરાજે ટેસ્ટ ક્રિકેટમાં જેક ક્રાઉલીની વિકેટ લઈને વિદેશી ભૂમિ ઉપર 100 વિકેટ પુરી કરી હતી. ઓવલ ગ્રાઉન્ડ પર રમાયેલી ટેસ્ટ મેચ ભારતની બહાર તેની 27મી ટેસ્ટ હતી, જેમાં તેણે 100 વિકેટની સિધ્ધિ હાંસલ કરી હતી. આ સાથે તે કપિલ દેવ, જવાગલ શ્રીનાથ, ઝહીર ખાન, ઇશાંત શર્મા, મોહમ્મદ શમી અને જસપ્રીત બુમરાહ બાદ વિદેશી ધરતી પર 100થી વધુ વિકેટ લેનાર 7મો ભારતીય ફાસ્ટ બોલર બન્યો છે.
સિરાજે ભારતની બહાર ટેસ્ટ મેચોમાં સારો દેખાવ કર્યો છે. ડિસેમ્બર 2020માં ઓસ્ટ્રેલિયા સામે ભારત માટે ટેસ્ટ ડેબ્યૂ કર્યા પછી સિરાજ ઓસ્ટ્રેલિયામાં 8 ટેસ્ટમાં 33 વિકેટ લીધી છે. ઇંગ્લેન્ડમાં, તેણે 11 ટેસ્ટમાં 42 વિકેટ અને દક્ષિણ આફ્રિકામાં ચાર મેચમાં 12 વિકેટ લીધી હતી.
અનિલ કુંબલે ભારત માટે વિદેશી ધરતી પર સૌથી વધુ ટેસ્ટ વિકેટ લેવાનો રેકોર્ડ ધરાવે છે. મહાન સ્પિનરે તેની 18 વર્ષની કારકિર્દીમાં વિદેશી ધરતી પર 69 ટેસ્ટ મેચ રમી હતી અને 269 વિકેટ ઝડપી હતી. એ પછી કપિલ દેવ બીજા ક્રમે છે. તેણે 66 ટેસ્ટમાં 215 વિકેટ લીધી હતી. ઝહીર ખાન વિદેશમાં ભારતનો ત્રીજા સૌથી સફળ બોલર છે. તેણે 54 ટેસ્ટમાં 207 વિકેટ લીધી હતી.
