સુરત પશ્ચિમ બેઠકના ધારાસભ્ય પૂર્ણેશ મોદી સોમવાર, 16 ફેબ્રુઆરીએ ગુજરાત વિધાનસભાના ડેપ્યુટી સ્પીકર તરીકે ધ્વની મતથી ચૂંટાઈ આવ્યાં હતાં. આ બંધારણીય પદ માટેની ચૂંટણીમાં ભાજપના ધારાસભ્ય પૂર્ણેશ મોદી અને કોંગ્રેસના ધારાસભ્ય શૈલેષ પરમારે શુક્રવાર, 13 ફેબ્રુઆરીએ ઉમેદવારી પત્રો ભર્યા હતાં.
વિધાનસભાના બજેટ સત્રના પ્રથમ દિવસે રાજ્યપાલના સંબોધન બાદ વિધાનસભાના ઉપાધ્યક્ષ પદ માટેની ચૂંટણી પ્રક્રિયા હાથ ધરાઈ હતી. ભાજપ તરફથી જીતુ વાઘાણીએ પૂર્ણેશ મોદીના નામની દરખાસ્ત મૂકી હતી અને ધ્વનિ મતથી થયેલા મતદાનમાં પૂર્ણેશ મોદીને સ્પષ્ટ બહુમતી મળી હતી. તેમની જીત થતા જ ભાજપના સભ્યોએ ‘જય શ્રી રામ’ના નારા સાથે ગૃહ ગજવી દીધું હતું.
૧૮૨ સભ્યોની વિધાનસભામાં ભાજપ પાસે ૧૬૨ બેઠકો સાથે પ્રચંડ બહુમતી હોવાથી પૂર્ણેશ મોદીનો વિજય નિશ્ચિત હતો. કોંગ્રેસ પાસે ફક્ત ૧૨ ધારાસભ્યો છે. ગયા વર્ષે ડિસેમ્બરમાં વર્તમાન જેઠાભાઈ ભરવાડે તેમના “વ્યસ્ત સમયપત્રક” ને ટાંકીને રાજીનામું આપ્યું હોવાથી ચૂંટણી જરૂરી બની છે.
પૂર્ણેશ મોદી સુરત પશ્ચિમના ધારાસભ્ય અને ભૂતપૂર્વ પ્રધાન છે. વિધાનસભાની કાર્યવાહી અને નિયમો પર તેમની સારી પકડ છે, જે ઉપાધ્યક્ષ તરીકે ગૃહનું સંચાલન કરવામાં મદદરૂપ થશે. સુરત અને દક્ષિણ ગુજરાતમાં તેમનું મજબૂત સંગઠનાત્મક વર્ચસ્વ છે. સામાજિક અને પ્રાદેશિક સંતુલન જાળવવા પક્ષે આ વ્યૂહાત્મક નિર્ણય લીધો છે.
૨૦૧૯માં પૂર્ણેશ મોદી ચર્ચામાં આવ્યાં હતાં. તેમણે કોંગ્રેસના નેતા અને વાયનાડના સાંસદ રાહુલ ગાંધી વિરુદ્ધ મોદી અટકનો ઉપયોગ કરીને વડાપ્રધાન નરેન્દ્ર મોદીની સરખામણી લલિત મોદી અને નીરવ મોદી જેવા ભાગેડુઓ સાથે કરવા બદલ ફોજદારી માનહાનિનો કેસ દાખલ કર્યો.
ગુજરાત વિધાનસભાના બજેટ સત્રનો ૧૬ ફેબ્રુઆરી પ્રારંભ થયો હતો. તે ૨૫ માર્ચ સુધી ચાલશે, જેમાં ૨૦૨૬-૨૭નું બજેટ ૧૭ ફેબ્રુઆરીએ નાણાપ્રધાન કનુ દેસાઈ રજૂ કરશે.
