લંડનના રોયલ ફેસ્ટિવલ હોલ ખાતે 22 ફેબ્રુઆરીએ યોજાયેલા બ્રિટિશ એકેડેમી ઓફ ફિલ્મ એન્ડ ટેલિવિઝન એવોર્ડ્સ (બાફ્ટા) સમારંભમાં ફરહાન અખ્તરના એક્સેલ એન્ટરટેઈનમેન્ટ દ્વારા નિર્મિત મણિપુરી કોમેડી-ડ્રામા ‘બોંગ’ને બેસ્ટ ચિલ્ડ્રર એન્ડ ફેમિલી ફિલ્મ કેટેગરીમાં બાફ્ટ એવોર્ડ મળ્યો હતો. આ એવોર્ડ સમારંભમાં બોલિવૂડ સ્ટાર આલિયા ભટ્ટ સેલિબ્રિટી ગેસ્ટ પ્રેઝન્ટર બની હતી અને “નમસ્તે”થી શરૂઆત કરી હતી.
ફરહાન અખ્તર દ્વારા નિર્મિત મણિપુરી ફિલ્મે ‘આર્કો’, ‘લિલો એન્ડ સ્ટીચ’ અને ‘ઝુટ્રોપોલિસ 2’ સહિતની ઘણી મજબૂત આંતરરાષ્ટ્રીય ફિલ્મોને પાછળ છોડી દીધી હતી. લક્ષ્મીપ્રિયા દેવી દ્વારા દિગ્દર્શિત બોંગ સામાજિક અને રાજકીય તણાવના સમયમાં મણિપુરમાં રહેતા એક નાના છોકરાની વાર્તા કહે છે. ફિલ્મના શીર્ષકનો અર્થ મણિપુરી ભાષામાં “નાનો છોકરો” થાય છે. સપ્ટેમ્બર 2025માં થિયેટરોમાં રિલીઝ થાય તે પહેલાં બોંગને ઘણા આંતરરાષ્ટ્રીય ફિલ્મ ફેસ્ટિવલમાં દર્શાવવામાં આવી હતી. તેનું પ્રીમિયર 2024માં ટોરોન્ટો ઇન્ટરનેશનલ ફિલ્મ ફેસ્ટિવલમાં થયું હતું
આ એવોર્ડ સમારંભમાં લિયોનાર્ડો ડી કેપ્રિયો અભિનીત ફિલ્મ ‘વન બેટલ આફ્ટર અધર’ બેસ્ટ ફિલ્મ અને બેસ્ટ ડાયરેક્ટર સહિત છ ટ્રોફી સાથે છવાઈ ગઈ હતી. બાફ્ટાના પ્રમુખ પ્રિન્સ વિલિયમ અને પત્ની કેટ મિડલટન મુખ્ય મહેમાનોમાં તરીકે સામેલ થયાં હતાં. પ્રિન્સ ઓફ વેલ્સે NBC યુનિવર્સલ એન્ટરટેઈનમેન્ટના ચેરમેન ડેમ ડોના લેંગલીને આ વર્ષની બાફ્ટા ફેલોશિપ અર્પણ કરી હતી.
