ઇરાન સાથે અમેરિકા અને ઇઝરાયેલના યુદ્ધ દરમિયાન બોલીવૂડમાં કાર્યરત ઇરાની મૂળના કલાકારો પણ ચર્ચામાં આવ્યા છે. એલનાઝ નોરોઝીએ સોશિયલ મીડિયા પર ઇરાન વિશે એક પોસ્ટ મુકી હતી. તેણે સોશિયલ મીડિયા દ્વારા ઇરાનના સુપ્રીમ લીડર અયાતુલ્લા અલી ખામેનેઇના મૃત્યુ પર ખુશી વ્યક્ત કરી હતી, જેના કારણે તે ચર્ચામાં રહી હતી. એલનાઝ સિવાય બોલીવુડમાં ઇરાની મૂળના ઘણા કલાકારો છે જેની માહિતી અહીં રજૂ કરવામાં આવી છે.
જ્હોન અબ્રાહમ અને બોમન ઇરાની
પીઢ અભિનેતા બોમન ઇરાની અને એક્શન અભિનેતા જ્હોન અબ્રાહમ બોલીવૂડમાં ખૂબ જાણીતાછે. તેમનો ઇરાન સાથે ગાઢ સંબંધ છે. જ્હોન અબ્રાહમનો જન્મ મુંબઇમાં કેરળના મલયાલી સીરિયન ક્રિશ્ચિયન પિતા અને ઇરાની ઝોરોસ્ટ્રિયન માતાને ત્યાં થયો હતો. બોમન ઇરાનીનો જન્મ મુંબઇમાં એક ઇરાની ઝોરોસ્ટ્રિયન પરિવારમાં થયો હતો. બંન્ને કલાકારોના મૂળ ઇરાન સાથે જોડાયેલા છે.
જલાલ આઘા
બોલીવૂડની જુની ફિલ્મોના અભિનેતા જલાલ આઘા પણ ઇરાની મૂળના હતા. તેમણે ૩૦૦ જેટલી હિન્દી ફિલ્મોમાં અભિનય કર્યો હતો, જે તેમની કોમેડી ભૂમિકાઓ માટે જાણીતા હતા. તેઓ શોલેમાં મહેબૂબા… મહેબૂબા.. ગીતમાં પણ જોવા મળ્યા હતા. આઘાના પિતા ઇરાનથી બ્રિટિશ ભારતમાં સ્થળાંતર કરીને પૂણેમાં સ્થાયી થયા હતા. બાદમાં તેઓ કામની શોધમાં મુંબઇ ગયા હતા અને ત્યાં સ્થાયી થયા હતા. જલાલ આઘાનું 49 વર્ષની ઉંમરે માર્ચ 1995માં નવી દિલ્હીમાં નિધન થયું હતું.
એલનાઝ નવરોઝી
એલનાઝ નવરોઝી ઇરાની છે અને તે અંદાજે નવ વર્ષથી બોલીવૂડમાં સક્રિય છે. તે હિન્દી ફિલ્મોમાં તેના અભિનય અને ડાન્સ માટે જાણીતી છે. તેનો જન્મ તહેરાનમાં થયો હતો. તેણે જાણીતી ક્રાઇમ થ્રિલર સીરિઝ સેક્રેડ ગેમ્સમાં ઝોયા મિર્ઝાની ભૂમિકા ભજવી હતી.
મંદાના કરીમી
એલનાઝ નવરોઝી ઉપરાંત મંદાના કરીમી પણ ઇરાનની છે. તે એક જાણીતી મોડેલ રહી છે. કરીમીએ બોલીવુડ ફિલ્મોમાં પણ અભિનય કર્યો છે. તેણે ભાગ જોની અને ક્યા કૂલ હૈ હમ-થ્રી જેવી ફિલ્મોમાં કામ કર્યું હતું.
સજ્જાદ ડેલાફ્રૂઝ
સજ્જાદ ડેલાફ્રુઝ એક ઇરાની અભિનેતા છે. તે હિન્દી ફિલ્મોમાં પણ જોવા મળ્યો છે. તેણે સલમાન ખાનની ફિલ્મ ટાઇગર ઝિંદા હૈમાં અભિનય આપ્યો હતો. તેનો જન્મ ઇરાનમાં થયો હતો અને તે એક્શન થ્રિલર સીરિઝ સ્પેશિયલ ઓપ્સમાં પણ હતો.
