યુકેમાં ભારતીય મૂળની ફક્ત 11 વર્ષીય ચેસ ખેલાડી બોધના શિવાનંદન ઇન્ટરનેશનલ ચેસ ફેડરેશન (FIDE)ના નવા વિશ્વ ક્રમાંક મુજબ દેશની ટોચની મહિલા ચેસ ખેલાડી જાહેર થઇ છે. આ 11 વર્ષીય ખેલાડીના માતા-પિતા 2007માં તામિલનાડુના તિરૂચિરાપલ્લીથી ઇંગ્લેન્ડ આવ્યા હતા. FIDE રેન્કિંગમાં બોધના શિવાનંદનના 2366 રેટિંગ પોઇન્ટ છે. તેણે આ રેન્કિંગમાં ચાર વખતની બ્રિટિશ મહિલા ચેમ્પિયન 25 વર્ષીય લેન યાઓને પાછળ રાખી દીધી છે. આ સાથે તેને પ્રથમવાર ટોચની 100 મહિલા ચેસ ખેલાડીમાં સ્થાન મળ્યું છે. અત્યારે બોધના 72મા સ્થાને છે. ઇંગ્લેન્ડ ચેસ ફેડરેશને આ માહિતી જાહેર કરી છે. ભારતીય મૂળના પૂર્વ બ્રિટિશ વડાપ્રધાન રિષિ સુનકે બોધના શિવાનંદનની સિદ્ધિને બિરદાવી છે. આ સાથે તેમણે પોતાના પીએમ નિવાસસ્થાને બોધના સાથે અગાઉ રમેલી ચેસની ઘટનાને યાદ કરી હતી.
