સ્થાનિક કાઉન્સિલની ચૂંટણીઓમાં ટોરીઝનો ધબડકો

તા. 4 મેના રોજ યોજાયેલી ઇંગ્લેન્ડની સ્થાનિક કાઉન્સિલની ચૂંટણીઓમાં ટોરીઝનો ધબડકો થયો હતો જેની સામે લેબર અને લિબ ડેમ્સે કન્ઝર્વેટિવ્સના ભોગે પોતાની બેઠકો અને કાઉન્સિલમાં વધારો કર્યો હતો. લેબરે પોતાના ભૂતપૂર્વ ગઢ ગણાતા સ્વિંડન, પ્લેમથ, મેડવે અને સ્ટોક-ઓન-ટ્રેન્ટમાં નિયંત્રણ મેળવ્યું હતું. તો લિબ ડેમ્સે વિન્ડસર અને મેઇડનહેડ સહિત કન્ઝર્વેટિવ્સની પાંચ કાઉન્સિલ પર નિયંત્રણ મેળવ્યું છે.

વડાપ્રધાન બન્યા બાદ ઋષિ સુનક તેમની ચૂંટણીલક્ષી લોકપ્રિયતાની રીતે જોઇએ તો કન્ઝર્વેટિવ્સે 40 કાઉન્સિલ પરનું નિયંત્રણ ગુમાવતા નાપાસ થયા હતા.

આ હાર અંગે એજ્યુકેશન મિનિસ્ટર રોબર્ટ હાલ્ફને કહ્યું હતું કે ‘’આ વર્ષની ચૂંટણી આમારા પક્ષ માટે હંમેશા “મુશ્કેલ” રહેશે. ટોરી પાર્ટીના આંતરિક વિભાગોએ “મદદ કરી ન હતી” અને કોસ્ટ-ઓફ-લીવિંગ કટોકટી અને NHS માં સમસ્યાઓ જેવા બાહ્ય પરિબળોએ અસર કરી હતી. સત્તામાં રહેલી દરેક સરકાર, ખાસ કરીને 13 વર્ષથી સત્તામાં રહેલી સરકાર, સ્થાનિક ચૂંટણીઓમાં હંમેશા નુકસાન સહન કરે છે. જો કે શ્રી સુનકે પાર્ટીમાં એકતા પુનઃસ્થાપિત કરી છે અને દેશમાં, ખાસ કરીને અર્થતંત્રમાં સ્થિરતા લાવ્યા છે.”

લેબર નેતા સર કેર સ્ટાર્મરે કેન્ટ કાઉન્સિલમાં પક્ષની જીત થયા બાદ મેડવેમાં ઉપસ્થિત ભીડને કહ્યું હતું કે “લેબર આગામી સામાન્ય ચૂંટણીમાં બહુમતી જીતવા માટે “કોર્સ પર” છે.’’

ચહેરા પર “ચેશાયર-કેટ” સ્મિત ધરાવતા લિબરલ ડેમોક્રેટ નેતા સર એડ ડેવીએ વિન્ડસરમાં જણાવ્યું હતું કે ‘’મારી પાર્ટી માટે આ ગ્રાઉન્ડ બ્રેકિંગ નાઇટ હતી. આ વર્ષની સ્થાનિક ચૂંટણીઓમાં લિબરલ ડેમોક્રેટ્સ મોટો વિજેતા છે. મને ખૂબ ગર્વ છે.”

લિબરલ ડેમોક્રેટ્સે 2019માં કન્ઝર્વેટિવ્સ દ્વારા જીતેલા ડેકોરમ અને સ્ટ્રેટફોર્ડ-ઓન-એવન પર પણ નિયંત્રણ મેળવ્યું છે.

ગ્રીન પાર્ટીએ મિડ સફોકમાં તેની પ્રથમ કાઉન્સિલ પર સંપૂર્ણ નિયંત્રણ મેળવ્યું છે અને સમગ્ર ઇંગ્લેન્ડમાં વિક્રમી લાભ મેળવ્યા છે.

મિડલ્સબરોમાં, લેબરના ક્રિસ કૂક વર્તમાન ઇન્ડિપેન્ડન્ટ ઉમેદવારને હરાવી મેયર બન્યા હતા. જ્યારે મેન્સફિલ્ડ અને લેસ્ટરમાં લેબરના મેયર બન્યા હતા. લંડન, સ્કોટલેન્ડ કે વેલ્સમાં ચૂંટણીઓ થઈ નહતી. કિંગ ચાર્લ્સ III ના રાજ્યાભિષેકને કારણે નોર્ધર્ન આયર્લૅન્ડમાં કાઉન્સિલની ચૂંટણીઓને ગુરુવાર 18 મે પર ખસેડવામાં આવી છે.

ઈંગ્લેન્ડની કાઉન્સિલની ચૂંટણીઓની માહિતી

વિવિધ કાઉન્સિલ અને સત્તા મેળવનાર પક્ષ