દુબઇમાં રમાઇ રહેલી ટી20 એશિયા કપ 2025 ટુર્મામેન્ટ સુપર 4 તબક્કાની અંતિમ અને રોમાંચક મેચમાં ભારતે શ્રીલંકાને હરાવ્યું હતું. આ રોમાંચક મેચ સુપર ઓવરમાં પરિણમી હતી. ભારતે પહેલા બેટિંગ કરતા 5 વિકેટે 202 રનનો મજબૂત સ્કોર બનાવ્યો હતો. તેના જવાબમાં અંતિમ બોલમાં શ્રીલંકાએ પણ 202 રન કર્યા હતા, જેના કારણે મેચ ટાઈ થઈ ગઈ. ત્યારબાદ સુપર ઓવર રમાઈ હતી. ભારતે આ મેચમાં જસપ્રીત બુમરાહ અને શિવમ દુબેને આરામ આપ્યો હતો, જેના કારણે અર્શદીપ સિંહ અને હર્ષિત રાણાને સ્થાન મળ્યું હતું. અભિષેક શર્માએ ફરી એકવાર 22 બોલમાં 61 રન બનાવીને ટીમને મજબૂત શરૂઆત અપાવી. ત્યારબાદ તિલક વર્માએ 34 બોલમાં અણનમ 49 રન બનાવીને સ્કોર મજબૂત બનાવ્યો, પરંતુ અડધી સદીથી એક રન ઓછો રહ્યો. સંજુ સેમસને પણ 39 રનનું યોગદાન આપ્યું, જેનાથી ભારતને 202 રનનો સ્કોર બનાવવામાં મદદ મળી. 203 રનના લક્ષ્યનો પીછો કરતા શ્રીલંકાની શરૂઆત નબળી રહી. તેઓએ માત્ર સાત રનમાં એક વિકેટ ગુમાવી દીધી. કુસલ મેન્ડિસ કોઈ રન બનાવ્યા વિના આઉટ થયો. ત્યારબાદ પથુમ નિસાન્કા અને કુસલ પરેરા વચ્ચે મેચ વિજેતા ભાગીદારી થઈ. બંને ખેલાડીઓએ બીજી વિકેટ માટે 127 રન ઉમેર્યા. કુસલ પરેરા 32 બોલમાં 58 રન બનાવ્યા બાદ આઉટ થયો. પરંતુ પથુમ નિસાન્કા એક છેડો પકડીને 52 બોલમાં પોતાની સદી પૂરી કરી. તે અંતિમ ઓવરમાં 58 બોલમાં 107 રન બનાવીને આઉટ થયો. શ્રીલંકાને તે ઓવરમાં જીતવા માટે ૧૨ રનની જરૂર હતી, પરંતુ તે ફક્ત ૧૧ રન જ બનાવી શક્યું. ત્યારબાદ સુપર ઓવર રમાઈ હતી.
શ્રીલંકાએ સુપર ઓવરમાં પ્રથમ બેટિંગ કરી, પરંતુ તેઓ ફક્ત પાંચ બોલમાં જ 2 રન બનાવી શક્યા અને 2 વિકેટ ગુમાવી દીધી. જવાબમાં, ટીમ ઈન્ડિયાએ પહેલા જ બોલ પર જીત મેળવી લીધી હતી. આ સાથે, ટીમ ઈન્ડિયાએ ટુર્નામેન્ટમાં સતત છઠ્ઠી જીત મેળવી હતી.
