ભારત અને વેસ્ટ ઈન્ડિઝ વચ્ચે ત્રણ મેચોની ટી-20 સીરિઝની કોલકાતાના ઈડન ગાર્ડન્સ મેદાનમાં રમાયેલી અંતિમ મેચમાં ભારતે વેસ્ટ ઇન્ડિઝને 17 રને પરાજય આપીને શ્રેણીમાં 3-0થી વિજય મેળવ્યો હતો. ભારતની ટીમે પ્રથમ બેટિંગ કરતાં સૂર્યકુમારની વિસ્ફોટક હાફ સેન્ચુરીને કારણે 20 ઓવરના અંતે 5 વિકેટના નુકસાન પર 184 રન બનાવ્યા હતા. ભારત તરફથી સૌથી વધારે રન સૂર્યકુમાર યાદવે 31 બોલમાં 65 રન બનાવ્યા હતા. જેની સામે 185 રનોના ટાર્ગેટનો ચેઝ કરવા માટે ઉતરેલી વેસ્ટ ઈન્ડિઝની ટીમે 20 ઓવરના અંતે 9 વિકેટના નુકસાન પર 167 રન બનાવ્યા હતા. ત્રીજી ટી20 મેચમાં 17 રનોથી ભારતનો વિજય થતાં ભારતે ટી20 સીરિઝમાં વેસ્ટ ઈન્ડિઝને ક્લિન સ્વીપ કર્યું હતું.
આ વિજય સાથે ટીમ ઈન્ડિયાએ રેન્કિંગમાં નંબર 1નો તાજ હાંસલ કરી દીધો છે. પ્રથમ બેટિંગ કરતાં ભારતની શરૂઆત ખરાબ રહી હતી. રુતુરાજ ચાર રન બનાવીને પેવેલિયન પરત ફર્યો હતો. જે બાદ ઈશાન કિશન અને શ્રેયસ અય્યરે 36 બોલમાં 53 રનોની પાર્ટનરશિપ કરી હતી. અય્યરે 25 રન બનાવીને આઉટ થયો હતો. તો ઈશાન કિશને તેજ શરૂઆત કરવા છતાં પણ 31 બોલમાં 34 રન બનાવીને આઉટ થયો હતો. કેપ્ટન રોહિત શર્મા 15 બોલમાં 7 રન બનાવીને પેવેલિયન પરત ફર્યો હતો. વેંકટેશ અય્યરે 19 બોલમાં અણનમ 35 રન બનાવ્યા હતા. અંતિમ ટી20 મેચમાં ભારતે ચાર ફેરફાર કર્યા હતા. ઈન્ડિયન ટીમમાં આવેશ ખાન, ઋતુરાજ ગાયકવાડ, શ્રેયસ અય્યર અને શાર્દૂલ ઠાકુરની પસંદગી કરાઈ હતી.
185 રનોનો પીછો કરવા ઉતરેલી વેસ્ટ ઈન્ડિઝ ટીમની ખરાબ શરૂઆત થઈ હતી. ઓપનિંગ બેટર્સ કાયલી મેયર્સ 6 રન પર તો શાઈ હોપ 8 રન બનાવીને આઉટ થયો હતો. જે બાદ ત્રીજા નંબરે આવેલા નિકોલસ પૂરને ટીમને ગેમમાં પરત લાવવાનો પ્રયાસ કર્યો હતો. તેણે 47 બોલમાં 8 ચોગ્ગા અને 1 સિક્સની મદદથી 61 રન બનાવ્યા હતા. જો કે, તે વેસ્ટ ઈન્ડિઝને પરત ગેમમાં લાવી દીધો હતો. જે બાદ રોમવેન પોવેલે 25 રન, કાઈરોન પોલાર્ડે 5 રન, જેસન હોલ્ડર 2 રન, રોસ્ટોન ચેઝે 12 રન, રોમારિયો શેફર્ડે 29 રન, ફેબિયન એલને 5 રન, ડોમિનિક ડ્રેક્સે 4 રન બનાવ્યા હતા.
ભારતીય ટીમની ટી20 ઈન્ટરનેશનલમાં આ સતત 9મી જીત છે. ભારતને આ ફોર્મેટમાં છેલ્લા હારનો સામનો ગત વર્ષે વર્લ્ડ કપમાં પોતાની બીજી મેચમાં ન્યૂઝીલેન્ડની સામે કરવો પડ્યો હતો. તે બાદ ટુર્નામેન્ટમાં રમતાં ત્રણ મેચોમાં ભારતને જીત મળી હતી. ટીમે અફઘાનિસ્તાનને 66 રન, સ્કોટલેન્ડને 8 વિકેટ અને નામિબીયાને 9 વિકેટથી હરાવી હતી. ટુર્નામેન્ટ બાદ ન્યૂઝીલેન્ડની સામે 3 મેચોની ટી20 સીરિઝમાં પણ ટીમને 3-0થી જીત મળી હતી. આમ આ સાથે આ ફોર્મેટમાં સતત સૌથી વધારે જીત નોંધાવવા મામલે પાકિસ્તાન (9 મેચ)ના રેકોર્ડની બરાબરી કરી દીધી છે.
