શનિવારે (31 જાન્યુઆરી) તિરૂવનંતપુરમમાં ન્યૂઝીલેન્ડ સામેની પાંચમી અને છેલ્લી ટી-20માં ભારતે વધુ એક વખત ન્યૂઝીલેન્ડના બોલર્સની નિર્દયી રીતે ધોલાઈ કરી કેટલાય નવા રેકોર્ડ્ઝ સાથે 46 રને પ્રવાસી ટીમને હરાવી હતી. ટોસ જીતીને ભારતે પહેલા બેટિંગ કરવાનો નિર્ણય લીધો હતો અને ખાસ ધમાકેદાર ના કહી શકાય એવી શરૂઆત પછી ઈશાન કિશન અને સુકાની સૂર્યકુમાર યાદવની આતશબાજી સાથે પાંચ વિકેટે 271 રનનો જંગી સ્કોર ખડકી દીધો હતો.
એ પછી ન્યૂઝીલેન્ડની ટીમ છેલ્લી ઓવરમાં 225 રન કરી ઓલાઉટ થઈ ગઈ હતી. પોતાની પહેલી ટી-20 સદી બદલ ઈશાન કિશનને પ્લેયર ઓફ ધી મેચ તથા સુકાની સૂર્યકુમાર યાદવને પ્લેયર ઓફ ધી સીરીઝ જાહેર કરાયા હતા.
ભારતે 50 રન 5.4 ઓવરમાં, 100 રન 9.5 ઓવરમાં, 150 રન 12.4 ઓવરમાં, 200 રન 15.4 ઓવરમાં અને 250 રન 18.6 ઓવરમાં કર્યા હતા.
ઈશાન કિશનની આ સીરીઝમાં ધમાકેદાર બેટિંગ રહી હતી અને અંતિમ મેચમાં સદી સાથે તેણે ટી-20 વર્લ્ડ કપમાં ટીમના વિકેટકીપર તરીકે પોતાનું સ્થાન લગભગ નિશ્ચિત કરી લીધું હતું. તેના સંકેતરૂપે છેલ્લી મેચમાં સંજુ સેમસન ટીમમાં હોવા છતાં વિકેટકીપીંગની જવાબદારી કિશનને સોંપાઈ હતી. શનિવારની આતશબાજીનો અંદાજ એ આંકડાઓ આપે છે કે, ઈશાન કિશને 28 બોલમાં અડધી સદી અને પછી ફક્ત વધુ 14 બોલમાં બાકીની અડધી, એમ 42 બોલમાં સદી (103) ફટકારી હતી, જેમાં 10 છગ્ગા અને 6 ચોગ્ગાનો સમાવેશ થતો હતો. કિશને ઈશ સોઢીની એક ઓવરમાં તો 29 રન ઝુડી નાખ્યા હતા. સોઢીની આ ઓવર ન્યૂઝીલેન્ડ માટે ટી-20ની સૌથી મોંઘી ઓવર બની રહી હતી.
તેના સિવાય સૂર્યકુમાર યાદવે 30 બોલમાં છ છગ્ગા અને ચાર ચોગ્ગા સાથે 63, હાર્દિક પંડ્યાએ 17 બોલમાં ચાર છગ્ગા અને એક ચોગ્ગા સાથે 42 તથા અભિષેક શર્માએ 16 બોલમાં બે છગ્ગા અને ચાર ચોગ્ગા સાથે 30 રન કર્યા હતા.
ન્યૂઝીલેન્ડ તરફથી ઈશ સોઢી 3 ઓવરમાં 48 રન આપી 16ની એવરેજ અને એકપણ વિકેટ વિના સૌથી મોંઘો રહ્યો હતો, તો એકપણ બોલરની એવરેજ એક આંકડામાં નહોતી રહી. જેમીસને ચાર ઓવરમાં 59 રન આપી એક, જેકબ ડફીએ ચાર ઓવરમાં 53 રન આપી એક, સુકાની મિચેલ સેન્ટનરે ચાર ઓવરમાં 60 રન આપી એક તથા સૌથી વધુ સફળ બોલર, લોકી ફર્ગ્યુશને ચાર ઓવરરમાં 42 રન આપી બે વિકેટ લીધી હતી.
જવાબમાં ન્યૂઝીલેન્ડની પહેલી વિકેટ તો પહેલી ઓવરમાં જ પડી ગઈ હતી, સેઈફર્ટ ફક્ત પાંચ રન કરી અર્શદીપની ઓવરમાં વિદાય થયો હતો. પણ એ પછી રચિન રવિન્દ્ર અને ફિન એલને સદીની ભાગીદારી કરી હતી. રચિન 30 રન કરી વિદાય થયો હતો, તો ઓપનર એલને ધમાકેદારી બેટિંગ સાથે 38 બોલમાં છગ્ગા અને 8 ચોગ્ગા સાથે 80 રન કર્યા હતા. એ મેદાનમાં હતો ત્યાં સુધી તો ન્યૂઝીલેન્ડ કદાચ ટાર્ગેટ સફળતાપૂર્વક ચેઝ કરી જશે તેવું લાગતું હતું, કારણ કે બુમરાહ તથા હાર્દિક પંડ્યાને એકપણ વિકેટ નહોતી મળી, તો અર્શદીપે પહેલીવાર ટી-20માં પાંચ વિકેટ ખેરવી શ્રેષ્ઠ દેખાવ કર્યો હતો. તે ઉપરાંત અક્ષર પટેલે ચાર ઓવરમાં ફક્ત 33 રન આપી ત્રણ વિકેટ ઝડપી ન્યૂઝીલેન્ડની બેટિંગની કમર તોડી નાખી હતી. તેણે પહેલા આક્રમક બેટર ગ્લેન ફિલિપ્સની અને પછી ફિન એલનની વિકેટ ઝડપી સન્નાટો ફેલાવી દીધો હતો.
ચોથી ટી-20માં ન્યૂઝીલેન્ડનો 50 રને વિજયઃ અગાઉ, ગયા સપ્તાહે બુધવારે (28 જાન્યુઆરી) વિશાખાપટ્ટનમમાં રમાયેલી ચોથી ટી-20માં ન્યૂઝીલેન્ડનો આ સીરીઝનો એકમાત્ર વિજય નોંધાયો હતો. સૂર્યકુમાર યાદવે ટોસ જીતી ન્યૂઝીલેન્ડને પહેલા બેટિંગમાં ઉતાર્યું હતું. ન્યૂઝીલેન્ડના ઓપનર્સ ડેવોન કોન્વે અને ટીમ સઈફર્ટે ટીમ માટે પહેલી સદીની ભાગીદારી નોંધાવી હતી. પાવર પ્લેમાં ન્યૂઝીલેન્ડે છ ઓવરમાં વિના વિકાટે 71 રન કર્યા હતા. સઈફર્ટે 36 બોલમાં 62 અને કોન્વેએ 23 બોલમાં 44 રન કર્યા હતા. એ ઉપરાંત ડેરિલ મિચેલે 18 બોલમાં 39 કર્યા હતા. ભારત તરફથી અર્શદીપે ચાર ઓવરમાં 33 તથા કુલદીપે ચાર ઓવરમાં 39 રન આપી બે-બે વિકેટ લીધી હતી, તો બુમરાહે 38 તથા રવિ બિશ્નોઈએ 49 રન આપી એક-એક વિકેટ લીધી હતી.
ભારત તરફથી શિવમ દુબેએ ફક્ત 23 બોલમાં સાત છગ્ગા અને ત્રણ ચોગ્ગા સાથે 65, રીંકુ સિંઘે 30 બોલમાં 39 અને સંજુ સેમસને 15 બોલમાં 24 રન કર્યા હતા, પણ તેના સિવાય એકમાત્ર રીંકુ સિંઘ 10 રને પહોંચી શક્યો હતો. ભારત 18.4 ઓવરમાં ફક્ત 165 રને ઓલાઉટ થઈ ગયું હતું.
