એન્ડરસન-તેંડુલકર ટ્રોફી 2025ની બીજી ટેસ્ટ મેચમાં કેપ્ટન શુભમન ગિલની યાદગાર ઈનિંગ અને આકાશદીપની વેધક બોલિંગને સહારે ભારતે ઇંગ્લેન્ડને 336 રનથી હરાવીને પાંચ ટેસ્ટ મેચની સિરિઝ 1-1થી બરાબર કરી હતી.
બીજી ઇનિંગમાં ભારતે ઇંગ્લેન્ડને જીતવા માટે 608 રનનો જંગી ટાર્ગેટ આપ્યો હતો, જેનો પીછો કરતી યજમાન ટીમ 271 રનમાં ઓલઆઉટ થઈ ગઈ હતી. જીતના હીરો આકાશદીપે પહેલી ઇનિંગમાં 4 અને બીજી ઇનિંગમાં 6 મળી કુલ 10 વિકેટ ઝડપી હતી.
ભારતીય ટીમના કેપ્ટન શુભમન ગિલે ઈંગ્લેન્ડ સામે ચાલી રહેલી શ્રેણીની બીજી ટેસ્ટની પ્રથમ ઈનિંગમાં ૨૬૯ રન ફટકાર્યા બાદ બીજી ઈનિંગમાં પણ વિક્રમોની હારમાળા સર્જતાં ૧૬૧ રન નોંધાવ્યા હતા. આ સાથે બર્મિંગહામ ટેસ્ટમાં ગિલના કુલ મળીને ૪૩૦ રન થયાં હતાં.
આની સાથે બર્મિંગહામના એજબેસ્ટન મેદાન પર ભારતે પહેલી વાર ટેસ્ટ મેચ જીતી હતી. અગાઉ ભારતીય ટીમને આ મેદાન પર રમાયેલી 8 ટેસ્ટ મેચમાંથી સાતમાં હારનો સામનો કરવો પડ્યો હતો, જ્યારે એક મેચ ડ્રો રહી હતી.
ભારતીય ટીમે બેન સ્ટોક્સની ટીમને 608 રનનો લક્ષ્યાંક આપ્યો હતો. આ પછી આકાશ દીપ અને મોહમ્મદ સિરાજ જેવા ઓછા અનુભવી બોલરોની ઘાતક બોલિંગના આધારે ભારતે રનની દ્રષ્ટિએ આ સૌથી મોટી જીત મેળવી હતી.
ભારત માટે શુભમન ગિલે પહેલી ઇનિંગ્સમાં બેવડી સદી અને બીજી ઇનિંગ્સમાં સદી ફટકારી હતી. પહેલી ઇનિંગ્સમાં મોહમ્મદ સિરાજે 6 વિકેટ , જ્યારે આકાશ દીપે 4 વિકેટ લીધી હતી. બીજી ઇનિંગ્સમાં પણ આકાશદીપે કમાલ કરતા 6 વિકેટ લઈને અંગ્રેજોની હાલત બગાડી હતી.
ભારતની આ જીતનો વિશેષ મહત્ત્વ છે, કારણ કે ટીમ વિશ્વના નંબર વન બોલર જસપ્રીત બુમરાહ તથા વિરાટ કોહલી અને રોહિત શર્મા જેવા સિનિયર ખેલાડીઓ વગર રમ્યું હતું. મોહમ્મદ શમી પણ ઈજાને કારણે ટીમમાંથી બહાર હતો. ટોસ જીત્યા બાદ ઇંગ્લેન્ડે પ્રથમ બોલિંગ કરવાનો નિર્ણય લીધો હતો, પરંતુ ભારતીય બેટ્સમેનોએ તેમનો નિર્ણય ખોટો સાબિત કર્યો. ભારતીય ટીમે તેમની પ્રથમ ઇનિંગમાં શાનદાર બેટિંગ કરીને 587 રનનો વિશાળ સ્કોર બનાવ્યો હતો.
આ ઇનિંગની સૌથી મોટી ખાસિયત યુવા ઓપનર શુભમન ગિલનું અસાધારણ પ્રદર્શન હતું, જેણે (269 રન) શાનદાર બેવડી સદી ફટકારી હતી. જેનાથી ભારત મજબૂત સ્થિતિમાં આવ્યું હતું. ભારતના 587 રનના જવાબમાં ઇંગ્લેન્ડની ટીમ પ્રથમ ઇનિંગમાં 89.3 ઓવરમાં 407 રનમાં ઓલઆઉટ થઈ ગઈ હતી. 180 રનની લીડ સાથે બેટિંગ કરવા ઉતરેલી ભારતીય ટીમે પોતાની બીજી ઇનિંગમાં પણ આક્રમક રમત રમીને 6 વિકેટ ગુમાવીને 427 રન પર ઇનિંગ ડિકલેર કરી હતી.
ઈંગ્લેન્ડના બોલરો પર આગવા પ્રભુત્વ સાથે રમતાં ગિલે એક ટેસ્ટમાં કુલ મળીને સૌથી વધુ રન ફટકારવાના વર્લ્ડ રેકોર્ડમાં ઈંગ્લેન્ડના ધુરંધર ગ્રેહામ ગૂચ પછી બીજું સ્થાન મેળવ્યું હતુ. ગૂચે ૧૯૯૦માં ભારત સામેની લોર્ડ્ઝ ટેસ્ટમાં ૩૩૩ અને ૧૨૩ એમ કુલ મળીને ૪૫૬ રન કર્યા હતા.
ટેસ્ટ ઈતિહાસમાં કેપ્ટન તરીકેની પ્રથમ બે ટેસ્ટમાં કુલ ત્રણ સદી ફટકારવાનો રેકોર્ડ અત્યાર સુધી ભારતના વિરાટ કોહલીના નામે જ હતો, જે તેણે ૨૦૧૪ના ઓસ્ટ્રેલિયા પ્રવાસમાં નોંધાવ્યો હતો. હવે આ યાદીમાં ગીલે પણ સ્થાન મેળવી લીધું છે.
