નોર્થ વેસ્ટ લંડનના બ્રેન્ટમાં આવેલી કિંગ્સબરી હાઇ સ્કૂલમાં બે વિદ્યાર્થીઓને છરા મારી હત્યાનો પ્રયાસ કરનાર 13 વર્ષના તરૂણ પર હત્યાના પ્રયાસના બે ગુનાઓનો આરોપ મૂકવામાં આવ્યો છે, આ ઘટનાએ સ્થાનિક સમુદાયમાં ચકચાર ફેલાવી છે અને આતંકવાદ વિરોધી પોલીસ દ્વારા આ કેસની સઘન તપાસ શરૂ કરવામાં આવી છે.
બે વિદ્યાર્થીઓને છરા મારી ઇજા કરવામાં આવી હોવાના અહેવાલો મળ્યા બાદ તા. 10ને મંગળવારે બપોરે 12.40 વાગ્યે સ્કૂલના બેકોન લેન સ્થિત કેમ્પસ ખાતે પોલીસ અને એમ્બ્યુલન્સ સેવાઓ બોલાવવામાં આવી હતી. 12 અને 13 વર્ષના બે વિદ્યાર્થીઓને છરીના ઘા સાથે હોસ્પિટલમાં લઈ જવામાં આવ્યા હતા, જેમાંથી એકને મુખ્ય ટ્રોમા સેન્ટરમાં લઈ જવામાં આવ્યો હતો. પોલીસે જણાવ્યું હતું કે બંને તરૂણો ગંભીર પરંતુ સ્થિર સ્થિતિમાં છે અને તેમની ઇજાઓ જીવલેણ હોવાનું માનવામાં આવતું નથી.
પોલીસ તપાસકર્તાઓનું માનવું છે કે સંડોવાયેલો મનાતો શંકાસ્પદ કિશોર શાળાનો ભૂતપૂર્વ વિદ્યાર્થી છે અને તે બપોરે 12.30 વાગ્યે સ્થળ પર પહોંચ્યો હતો. પોલીસના જણાવ્યા અનુસાર, તેણે પહેલા માળના વર્ગખંડમાં પ્રવેશી 13 વર્ષના છોકરાને છરા મારતા પહેલા વિદ્યાર્થી પર જંતુનાશક સ્પ્રે છાંટ્યો હતો. કોરિડોર અને સીડી પરથી નીચે ઉતરીને તુરંત જ બીજા 12 વર્ષના બાળક પર છરી મારીને હુમલો કર્યો હોવાનો આરોપ છે. તે પછી તે શાળાના મેદાનમાંથી ભાગી ગયો હતો.
બનાવ બાદ સશસ્ત્ર પોલીસ અધિકારીઓ તૈનાત કરવામાં આવ્યા હતા અને પોલીસ હેલિકોપ્ટર દ્વારા વિસ્તારની શોધખોળ કરવામાં આવી હતી. શંકાસ્પદ કિશોર ગુમ થયો હોવાના અહેવાલો બાદ NW10 વિસ્તારની એક મસ્જિદમાંથી સાંજે લગભગ 4.50 વાગ્યે શંકાસ્પદ છોકરાની ધરપકડ કરવામાં આવી હતી. કાઉન્ટર ટેરરિઝમ પોલીસિંગ લંડને પુષ્ટિ કરી છે કે શંકાસ્પદનો મસ્જિદ સાથે કોઈ સંબંધ નથી અને તેનો સ્ટાફ સંપૂર્ણ સહયોગ કરી રહ્યો હતો.
સગીર વયનો હોવાથી કાયદેસર કારણોસર તેનું નામ જાહેર કરી શકાય તેમ નથી પણ તે કિશોર પર શાળાના પરિસરમાં છરી રાખવા અને ગેરકાયદેસર રીતે ઝેરી જંતુનાશક સ્પ્રે છાંટવાનો પણ આરોપ મૂકવામાં આવ્યો છે. શંકાસ્પદ આરોપી કિશોરને ગુરુવારે વેસ્ટમિન્સ્ટર મેજિસ્ટ્રેટની યુથ કોર્ટમાં હાજર કરાયો હતો.
ઘટનાના સંજોગોને કારણે આતંકવાદ વિરોધી અધિકારીઓ દ્વારા તપાસ કરવામાં આવી રહી હોવા છતાં, પોલીસે ભારપૂર્વક જણાવ્યું હતું કે તેને આતંકવાદી હુમલો જાહેર કરવામાં આવ્યો નથી અને તેઓ હેતુ અંગે ખુલ્લું મન રાખી રહ્યા છે. છરાબાજીમાં ઉપયોગમાં લેવાયેલ છરી મળી આવી છે, અને અધિકારીઓ સીસીટીવી ફૂટેજની તપાસ કરી રહ્યા છે અને 40 જેટલા સાક્ષીઓની પૂછપરછ કરી રહ્યા છે.
વડા પ્રધાનના પ્રશ્નોત્તરી સમય દરમિયાન આ હુમલા અંગે સંસદમાં પ્રશ્ન ઉઠાવવામાં આવ્યો હતો, જ્યાં સર કેર સ્ટાર્મરે પોલીસના ઝડપી પ્રતિભાવ માટે આભાર માન્યો હતો. લંડનના મેયર સાદિક ખાને માહિતી ધરાવતા કોઈપણ વ્યક્તિને આગળ આવવા વિનંતી કરી હતી, અને કહ્યું હતું કે આ પ્રકારની હિંસાનું “આપણા શહેરમાં કોઈ સ્થાન નથી”.
કિંગ્સબરી હાઇસ્કૂલના હેડ ટીચર એલેક્સ થોમસે આ ઘટનાને “ખૂબ જ આઘાતજનક” ગણાવી હતી, જ્યારે સ્થાનિક સાંસદ ડૉન બટલરે કહ્યું હતું કે આગામી દિવસોમાં માતાપિતા, વિદ્યાર્થીઓ અને સ્ટાફને સતત સમર્થનની જરૂર પડશે.
