વડાપ્રધાન નરેન્દ્ર મોદી બે દિવસની મુલાકાતના ભાગરૂપે 25 ફેબ્રુઆરીએ તેલ અવિવ પહોંચ્યા હતાં. અહી મોદીનું લાલ જાજમ પાથરીને સ્વાગત કરાયું હતું. ઇઝરાયલી વડાપ્રધાન બેન્જામિન નેતન્યાહૂ અને તેમના પત્ની સારાએ બેન ગુરિયન એરપોર્ટ પર ભારતીય નેતાનું સ્વાગત કર્યું હતું, જે દ્વિપક્ષીય સંબંધોમાં નવી ગતિનો સંકેત આપે છે. નેતન્યાહૂએ ભારતીય વડા પ્રધાનનું ઉષ્માભર્યું આલિંગન અને હાથ મિલાવીને સ્વાગત કર્યું હતું.
બંને નેતાઓ વચ્ચે ટૂંકી વાતચીત પણ થઈ હતી. છેલ્લા 9 વર્ષમાં પીએમ મોદીની આ બીજી મુલાકાત છે. વર્ષ 2017માં તેમની મુલાકાત બાદ ભારત અને ઈઝરાયલના સંબંધો ‘વ્યૂહાત્મક ભાગીદારી’માં ફેરવાયા હતા. જોકે, વર્તમાન યુદ્ધની સ્થિતિ વચ્ચે આ મુલાકાત રાજકીય રીતે ખૂબ જ મહત્ત્વની છે.
આ મુલાકાત દરમિયાન મોદી ઇઝરાયલી સંસદને સંબોધિત કરશે તથા વડાપ્રધાન બેન્જામિન નેતન્યાહૂ અને પ્રેસિડન્ટ આઇઝેક હર્ઝોગ સાથે ઉચ્ચસ્તરીય બેઠકો યોજશે.
વડાપ્રધાનની મુલાકાત દરમિયાન ઈઝરાયેલ સાથે મહત્ત્વની ડીફેન્સ ડીલ થવાની શક્યતા છે. ઈઝરાયેલ પાસેથી લેઝર ગાઈડેડ હથિયારો, બ્રહ્મોસથી વધુ ખતરનાક લાંબા અંતરની હાઈપરસોનિક મિસાઈલ, સ્પાઈસ બોમ્બ ખરીદવા કરાર થઈ શકે છે. મોદીની મુલાકાત પહેલા બન્ને દેશો વચ્ચે મુક્ત વેપાર સમજૂતી માટે વાટાઘાટોનો પ્રારંભ થયો હતો.
ઈઝરાયેલ પાસેથી આયર્ન ડોમ એર ડિફેન્સ સીસ્ટમ અને એડવાન્સ્ડ ડ્રોન ખરીદવા બાબતે પણ વિચારણા ચાલી રહી છે. મેક ઈન ઈન્ડિયા અભિયાન હેઠળ ઈઝરાયેલના સહકારથી કેટલાક અદ્યતન હથિયારોનું નિર્માણ ભારતમાં થઈ શકે છે. ઈઝરાયેલના રાજદૂતે મોદીની આ મુલાકાતને અત્યંત મહત્ત્વની ગણાવી હતી. ક્વોન્ટમ, સાયબર સિક્યુરિટી અને એઆઈ જેવા મહત્ત્વના ક્ષેત્રોમાં સહયોગની શક્યતા તેમણે વ્યક્ત કરી છે.
શહેરના કેન્દ્રો અને મહત્ત્વની ઈમારતોને મિસાઈલ કે ડ્રોન હુમલાથી બચાવવા માટે ભારત સુદર્શન ચક્ર નામની મલ્ટિ-ટિયર એર ડિફેન્સ સીસ્ટમ વિકસાવવા પ્રયાસ કરી રહ્યું છે. 2035 સુધીમાં આ લક્ષ્ય સાકાર કરવા માટે આયર્ન ડોમ, એરો અને ડેવિડ્સ સ્લિંગ સીસ્ટમ જેવી ઈઝરાયલની ટેકનોલોજીનો ઉપયોગ કરવા કરાર થઈ શકે છે.
ભારતે હથિયારો ખરીદવા માટે મંજૂર કરેલા નાણાનો ઉપયોગ ઈઝરાયેલ પાસેથી સ્પાઈસ-100 ગાઈડેડ બોમ્બ કિટ ખરીદવા ઉપયોગ થઈ શકે છે. SPICE-સ્માર્ટ, પ્રીસાઈઝ ઈમ્પેક્ટ, કોસ્ટ-ઈફેક્ટિવ- કહેવતા આ બોમ્બમાં જીપીએસની સાથે ઈલેક્ટ્રો-ઓપ્ટિકલ ગાઈડન્સ ટેકનોલોજીનો ઉપયોગ થાય છે, જેની મદદથી લાંબા અંતરના ટાર્ગેટને હિટ કરી શકાય છે. વિપરિત હવામાન અથવા જીપીએસ ઠપ થઈ જાય તો પણ આ બોમ્બ અત્યંત સચોટ હુમલા કરી શકે છે.
