સિંગાપોરમાં 71 વર્ષીય ભારતીય મૂળની વૃદ્ધાને કબૂતરને ચણ નાખવા બદલ સ્થાનિક કોર્ટે દંડ ફટકાર્યો હતો. આ મહિલાને શહેરના સૌથી જૂના હાઉસિંગ એસ્ટેટમાં છ મહિનામાં નવ વખત કબૂતરોને ચણ નાખવા બદલ સિંગાપોર વાઇલ્ડલાઇફ એક્ટ હેઠળ તાજેતરમાં 2,518 ડોલરનો દંડ ફટકારવામાં આવ્યો હતો. તોઆ પાયોહ હાઉસિંગ એસ્ટેટનાં રહેવાસી સિંગાપોરનાં સણમુગમનાથન શામલા ચાર ગુનામાં દોષિત ઠર્યા હતા. ચેનલ ન્યૂઝ એશિયાના રીપોર્ટ મુજબ, તેમને અગાઉ પણ જંગલી પક્ષીઓને ચણ નાખવા બદલ દંડ ફટકારવામાં આવ્યો હતો અને તેમણે ફરીથી આવું નહીં કરે તેવું વચન પણ આપ્યું હતું. કોર્ટને જણાવવામાં આવ્યું હતું કે, શામલાને ગત વર્ષે મે મહિનામાં તોઆ પાયોહમાં તેના એપાર્ટમેન્ટ નજીક ગેરકાયદે રીતે કબૂતરોને ચણ નાખવા બદલ 1,200 સિંગાપોર ડોલરનો દંડ ફટકારવામાં આવ્યો હતો. તેમણે નેશનલ પાર્ક્સ બોર્ડ (NParks)માં કબૂતર પકડવાની કામગીરીમાં પણ અડચણ ઊભી કરી હતી. એનપાર્ક્સના પ્રોસીક્યુટરે કોર્ટને જણાવ્યું હતું કે, આ વૃદ્ધા જાણતા હતા કે, આવા જંગલી પક્ષીઓને ચણ નાખવું એ ગુનો છે, પરંતુ જુલાઈ 2025 અને જાન્યુઆરી 2026 વચ્ચે નવ વખત તેમણે કબૂતરોને ચણ નાખી હતી.
