સ્પેનમાં પાંચ લાખ જેટલા ગેરકાયદે માઇગ્રન્ટ્સને રહેવાની મંજૂરી આપવાની સરકારે યોજના બનાવતા દેશમાં રાજકીય વિવાદ પ્રસર્યો છે. આ પ્રકારની યોજના યુરોપ અને અમેરિકામાં લાગુ કરવામાં આવેલી ઇમિગ્રેશનની કડક નીતિઓથી ખૂબ જ વિરોધાભાસ ધરાવે છે. આ યોજના અંતર્ગત યોગ્યતા ધરાવતા માઇગ્રન્ટ્સને એક વર્ષ સુધી રહેવાની અને વર્ક પરમિટ આપવામાં આવશે. સ્થાનિક વિરોધીઓએ અને એલન મસ્કે આ યોજનાની ટીકા કરી હતી, પરંતુ સોશિયાલિસ્ટ વડાપ્રધાન પેડ્રો સેન્ચેઝે આ નીતિનો બચાવ કર્યો હતો.
માઇગ્રેશન બાબતોનાં પ્રધાન એલ્મા સૈઝે પત્રકારોને જણાવ્યું હતું કે, 2025ના અંત સુધીમાં ઓછામાં ઓછા પાંચ મહિના સુધી સ્પેનમાં રહ્યા હોય અને કોઈ ગુનાઇત રેકોર્ડ ન ધરાવતા ગેરકાયદે માઇગ્રન્ટ્સ, તેમજ વર્ષના અંત અગાઉ આશ્રિત તરીકે અરજી કરનારાઓ રેસિડેન્ટ પરમિટ મેળવવા માટે હકદાર રહેશે. આ પરમિટ એક વર્ષ માટે માન્ય રહેશે, અથવા બાળકોના કિસ્સામાં પાંચ સુધી માન્ય રહેશે, તે રીન્યુ પણ થઇ શકશે. જો, માઇગ્રન્ટ્સ લેટિન અમેરિકન દેશો અથવા શરણાર્થી હોય તો દસ વર્ષ પછી અથવા વહેલા પણ નાગરિક બની શકે છે.
સ્પેનની વસતી છેલ્લા ત્રણ વર્ષમાં 1.5 મિલિયનથી વધીને 48.9 મિલિયન થઈ ગઈ છે, જેમાં મોટાભાગનો વધારો ઇમિગ્રેશનને કારણે થયો છે. તાજેતરના માઇગ્રન્ટસમાં લેટિન અમેરિકનોનો હિસ્સો 70 ટકા છે. પરંતુ 90 ટકા જેટલી નવી નોકરીઓ ઇમિગ્રન્ટ્સને મળી હોવાથી વ્યક્તિગત આવકમાં જુજ વધારો થયો છે. ઇમિગ્રેશનને કારણે, દર વર્ષે 140,000 નવા ઘર બનાવવાની જરૂર છે, પરંતુ તેની સામે માત્ર 80,000 નવા ઘરનું જ નિર્માણ થાય છે.
જમણેરી પક્ષ- વોક્સના નેતા સેન્ટિઆગો અબાસ્કલે સરકાર પર માઇગ્રેશનને ઉત્તેજન આપવાનો આરોપ મુક્યો હતો. અન્ય પક્ષના નેતાઓએ જણાવ્યું હતું કે, આ નીતિથી દેશની રાષ્ટ્રીય ઓળખ જોખમમાં મૂકાશે. વોક્સ આ મુદ્દાને સુપ્રીમ કોર્ટમાં લઇ જશે. સ્પેનમાં ઇમિગ્રેશન અંગે લોકોની ચિંતા વધી છે. વિવિધ ચૂંટણીઓમાં ઘર, બેરોજગારી ઉપરાંત ઇમિગ્રેશનનો મુદ્દો પણ ચર્ચામાં રહે છે.
