બોલીવૂડમાં અત્યારે મોહિત સુરી દિગ્દર્શિત અને નવોદિત કલાકારો દ્વારા અભિનિત સુપર-ડુપર હિટ ફિલ્મ ‘સૈયારા’ નવા વિક્રમો સ્થાપી રહી છે. યશરાજ ફિલ્મ્સ નિર્મિત આ પ્રેમગાથા આધારિત ફિલ્મ હવે રૂ. 300 કરોડ ક્લબમાં પ્રવેશ કરી ચુકી છે. રીલીઝ થયાના માત્ર ત્રણ અઠવાડિયામાં આ ફિલ્મે આટલો મોટો બિઝનેસ કરી લીધો છે.
ફિલ્મ સમીક્ષકોનું માનવું છે કે આ ફિલ્મે બીજા અઠવાડિયામાં જ આ રોકોર્ડ બનાવી લીધો હોત પરંતુ ‘મહાવતાર નરસિમ્હા’ રીલીઝ થતાં ‘સૈયારા’ને આ લક્ષ્યાંક સુધી પહોંચવામાં થોડી વધુ રાહ જોવી પડી હતી. પરંતુ જો કમાણીના આંકડા જોવામાં આવે તો તેણે કેટલા દિવસમાં કમાણી કરી તે જોવામાં આવતું નથી, આ ફિલ્મ રિલીઝ થઈ એ પહેલાં કોઈએ કલ્પના પણ કરી નહોતી કે આ ફિલ્મ આટલી હિટ જશે.
ખરેખર તો ફિલ્મ રિલીઝ થઈ ત્યારે લવ સ્ટોરી અને નવા કલાકારો જેવી બાબતોને કારણે કોઈએ એવું વિચાર્યું પણ નહોતું કે, ‘સૈયારા’ 100 કરોડ પણ મેળવી શકશે. કેટલાક ફિલ્મ નિષ્ણાતો માને છે કે, તદ્દન નવા કલાકારો હોવાથી ફિલ્મે 50 કરોડની કમાણી કરી હોત તો પણ તેમના માટે મોટી સફળતા હતી. હજુ 14 ઓગસ્ટે યશરાજની જ ‘વૉર 2’ અને રજનીકાંતની ‘કૂલી’ જેવી બે ટી ફિલ્મ રિલીઝ થઇ રહી છે તેથી તેના પછી આ બે ફિલ્મ માટે ઘણા સ્ક્રીન અને શો ફાળવાશે. આમ છતાં, કેટલાંક થીએટરમાં ‘સૈયારા’ ફિલ્મ રૂ. 330 કરોડનો બિઝનેસ કરશે તેવી સંભાવના છે.
આ ઉપરાંત બોલીવૂડમાં છેલ્લાં કેટલાક સમયથી ઘણી ફિલ્મો સફળ થઈ રહી છે. તેમાં કેટલીક સુપર-ડુપર ફિલ્મોએ તો ખૂબ જ ગણતરીના દિવસોમાં રૂ. 250 કરોડથી વધુનો બિઝનેસ કરી લીધો હતો. ‘પુષ્પા 2’ અને ‘જવાન’એ આ આંકડો માત્ર ચાર દિવસમાં પાર કરી લીધો હતો. તેણે નવી ફિલ્મો માટે પણ નવો ટાર્ગેટ આપી દીધો હતો. ત્યાર પછી ‘પઠાણ’, ‘અનિમલ’ અને ‘ગદ્દર 2’ પણ આ ક્લબમાં જોડાઈ ગઈ હતી. હવે એ દિવસો જતાં રહ્યાં જ્યારે 100 કરોડનું લક્ષ્ય પાર કરવું એ કોઈ મોટી સફળતા માનવામાં આવતી હોય. હવે ફિલ્મ સરળતાથી 200 અને 300 કરોડ સુધી પહોંચી જાય છે. અહીં રીલિઝ થયાના ગણતરીના દિવસોમાં જ 250 કરોડના આંકડાને પાર કરનારી ફિલ્મોની માહિતી રજૂ કરવામાં આવી છે.
પુષ્પા 2 : 4 દિવસ : 285.7 કરોડ
અલ્લુ અર્જૂનની ‘પુષ્પા’નો પ્રથમ ભાગ સફળ રહ્યા પછી તેની આ ફિલ્મ પર બધાની નજર હતી. આ ફિલ્મ પણ બધાની અપેક્ષાઓ પર ખરી ઉતરી. ફિલ્મ રિલીઝ થઈ એ પહેલાં તેની હાઇપ પણ ઊભી કરવામાં આવી હતી. જે રીતે તેનો માહોલ બન્યો હતો, તેમાંથી માત્ર ચાર જ દિવસમાં આ ફિલ્મે 285.7 કરોડનું લક્ષ્ય પાર કરી લીધું હતું.
જવાન : 4 દિવસ : 252.08 કરોડ
શાહરુખ ખાનની જવાન ફિલ્મમાં તેની એક્શનને દર્શકોએ ઘણી આવકારી હતી. આ ફિલ્મની માસ અપીલ, તેનાં લાગણીસભર સીન અને અટલીના દિગ્દર્શનના કારણે આ ફિલ્મ બોક્સ ઓફિસ પર શિખરે પહોંચી હતી. આ ફિલ્મે ચાર દિવસની અંદર 250 કરોડને પાર પહોંચી ગઈ હતી.
પઠાણ : 5 દિવસ : 271 કરોડ
આ ફિલ્મ શાહરુખની કમબેક સમાન હતી. એક્શન અને દેશભક્તિથી ભરપૂર આ ફિલ્મ વર્ષની સૌથી સફળ ફિલ્મમાંની એક રહી હતી. આ ફિલ્મે માત્ર પાંચ દિવસના સમયમાં આ ફિલ્મ 271 કરોડને પાર કરી ગઈ હતી.
એનિમલ : 5 દિવસ : 250.66 કરોડ
ક્રૂર અને હિંસા સાથે લાગણીથી ભરપૂર રણબીર કપૂરની આ ફિલ્મ અનિમલ ટીકા હોય કે વખાણ પણ સતત ચર્ચામાં રહી હતી. નવા પ્રકારની વાર્તા અને સંગીતના કારણે આ ફિલ્મ માત્ર પાંચ જ દિવસમાં 250 કરોડે પહોંચી ગઈ હતી. તેના કારણે રણબીર કપૂરનો સફળતાનો ગ્રાફ પણ ઊંચે પહોંચી ગયો હતો.
ગદર 2 : 6 દિવસ : 261.35 કરોડ
પીઢ અભિનેતા સન્ની દેઓલ લગભગ વીસ વર્ષ પછી આ ફિલ્મમાં તારા સિંઘ તરીકે જોવા મળ્યો હતો. ગદ્દર 2નો એક અલગ ચાહકવર્ગ રહ્યો છે અને તે ફિલ્મમાં દર્શકોમાં પણ એક અલગ લાગણી જન્માવાની ક્ષમતા છે. તેણે બોક્સ ઓફિસ પર એવી કમાલ બતાવી કે માત્ર છ દિવસમાં 250 કરોડના આંકડાને પાર કરી લીધો હતો.
સ્ત્રી 2 : 6 દિવસ : 255.35 કરોડ
હોરર-કોમેડી ફિલ્મ ‘સ્ત્રી 2’ ફિલ્મની ટીમ અને દર્શકો બધાં માટે એક સરપ્રાઇઝ હતી. તેમાં ડર, હાસ્ય સાથે સામાજિક કટાક્ષ પણ હતો, જે તેના પ્રથમ ભાગ કરતાં પણ વધુ સારી ચાલી હતી. ફિલ્મે માત્ર છ દિવસના સમયમાં 255.35 કરોડની કમાણી કરી હતી.
કેજીએફ ચેપ્ટર 2 : 7 દિવસ : 255.05 કરોડ
આ મૂળ કન્નડ ફિલ્મ હિન્દીના દર્શકોમાં પણ ઘણી સારી ચાલી હતી, તેની સફળતા માટે ઘણા ઓછા લોકોને આશા હતી. યશનો જાદુ ઓડિયન્સ પર ચાલી ગયો હતો સાથે પ્રશાંત નીલના ડિરેક્શનનો સ્કેલ, એવો હતો કે લાંબા સમયથી દુષ્કાળમાં ચાલી રહેલી બોક્સ ઓફિસમાં 255 કરોડનો બિઝનેસ કરાવ્યો હતો.
બાહુબલી 2 : 8 દિવસ : 266.15 કરોડ
આ ફિલ્મે ભારતીય સિનેમાનું સમગ્ર દૃશ્ય જ બદલી નાંખ્યું હતું. રાજામૌલીની પ્રથમ બાહુબલી તો પાછળથી લોકપ્રિય થઈ પરંતુ એવા અંત સાથે અટકી કે બીજી ફિલ્મ માટે દેશભરમાં ઉત્સુકતા અને આતુરતાની આંધી આવી હતી. આ ફિલ્મ રિલીઝ થતાંની સાથે જ એવી છવાઈ ગઈ કે જે સમયે ફિલ્મ 100 કરોડ સુધી પહોંચે તો પણ ઐતિહાસિક સિદ્ધિ લાગતી ત્યારે આ ફિલ્મે 8 દિવસમાં 286.75 કરોડના આંકડે પહોંચી ગઇ હતી.
છાવા : 9 દિવસ : 286.75 કરોડ
આ એવી ફિલ્મ હતી જેણે ખૂબ ઝડપથી આ પડાવ પાર કરી લીધો હતો. મરાઠા યોદ્ધા છત્રપતિ સંભાજી મહારાજના જીવન પર આધારિત ફિલ્મ બોક્સ ઓફિસ પર છવાઈ ગઈ હતી અને લોકો આ ફિલ્મ જોવા ઉમટી પડ્યાં હતાં.
આ ફિલ્મો ઉપરાંત દંગલે 10 દિવસમાં 264.21 કરોડ, સંજુએ 10 દિવસમાં 265.48 કરોડ, ટાઇગર ઝિંદા હૈ 10 દિવસમાં 254.75 કરોડ, બજરંગી ભાઈજાન 11 દિવસમાં 250.02 કરોડ, સુલતાન 12 દિવસમાં 263.23 કરોડ, પીકે 12 દિવસમાં 255.77 કરોડ, વોર 12 દિવસમાં 260 કરોડ, ધૂમ 3 13 દિવસમાં 252.71 કરોડ, ટાઈગર-3 15 દિવસમાં 252.75 કરોડ, પદ્માવત 18 દિવસ 253.80 કરોડ, કલ્કિ 2898 એડી 18 દિવસમાં 254.60 કરોડ, કબીર સિંહ 22 દિવસમાં 251.94 કરોડ અને આરઆરઆર 23 દિવસમાં 250.09 કરોડ, તાન્હાજી 25 દિવસમાં 251.94 કરોડ અને ભૂલ ભુલૈયા 3ની કમાણી 28 દિવસમાં 251 કરોડ હતી.
