શ્રેયસ ઐય્યરની તોફાની સદી તથા સંજૂ સેમસન અને રવિન્દ્ર જાડેજાની આક્રમક બેટિંગની મદદથી ભારતે શનિવારે ધરમશાલા ખાતે રમાયેલી બીજી ટી20 ક્રિકેટ મેચમાં શ્રીલંકા સામે સાત વિકેટે ધમાકેદાર વિજય નોંધાવ્યો હતો. આ સાથે જ ભારતે ત્રણ મેચ ટી20 સીરિઝમાં 2-0ની અજેય સરસાઈ મેળવી લીધી છે. ભારતે ટોસ જીતીને શ્રીલંકાને પ્રથમ બેટિંગનું આમંત્રણ આપ્યું હતું. ઓપનર પથુમ નિસાંકાની અડધી સદીની મદદથી શ્રીલંકાએ નિર્ધારીત 20 ઓવરમાં પાંચ વિકેટે 183 રનનો સ્કોર નોંધાવ્યો હતો. જેના જવાબમાં ભારતીય ટીમે 17.1 ઓવરમાં ત્રણ વિકેટે 186 રન નોંધાવીને મેચ જીતી લીધી હતી. શ્રેયસ ઐય્યરે 74 રનની અણનમ ઈનિંગ્સ રમી હતી. ભારત અને શ્રીલંકા વચ્ચે અંતિમ ટી20 મેચ ધરમશાલામાં જ 27 ફેબ્રુઆરી રવિવારે જ રમાશે.
184 રનના લક્ષ્યાંકને પાર પાડવા ઉતરેલી ભારતીય ટીમની શરૂઆત નિરાશાજનક રહી હતી. સુકાની રોહિત શર્મા પ્રથમ ઓવરના અંતિમ બોલ પર આઉટ થઈ ગયો હતો. તેણે એક રન નોંધાવ્યો હતો જ્યારે ઈશાન કિશન 16 રન નોંધાવીને પેવેલિયન પરત ફર્યો હતો. ભારતે 44 રનના સ્કોર પર પોતાના બંને ઓપનર ગુમાવી દીધા હતા. જોકે, બાદમાં શ્રેયસ ઐય્યર અને સંજૂ સેમસનની જોડીએ આક્રમક બેટિંગ કરીને રન ગતિ ઝડપી બનાવી હતી.સેમસન અને ઐય્યરે 84 રનની ભાગીદારી નોંધાવી હતી. સેમસન 25 બોલમાં બે ચોગ્ગા અને ત્રણ સિક્સર સાથે 39 રન નોંધાવીને આઉટ થયો હતો. બાદમાં બેટિંગમાં આવેલા રવિન્દ્ર જાડેજાએ શરૂઆતથી જ આક્રમક વલણ અપનાવ્યું હતું અને તાબડતોબ બેટિંગ કરી હતી. સામે છેડે ઐય્યરે પણ આક્રમણ જારી રાખ્યું હતું અને ભારતના વિજયને આસાન બનાવી દીધો હતો. ઐય્યરે 44 બોલમાં છ ચોગ્ગા અને ચાર સિક્સર સાથે અણનમ 74 રન ફટકાર્યા હતા જ્યારે જાડેજાએ 18 બોલમાં સાત ચોગ્ગા અને એક સિક્સર સાથે 45 રનની અણનમ ઈનિંગ્સ રમી હતી. શ્રીલંકા માટે લાહિરુ કુમારાએ બે તથા દુશમંથા ચમીરાએ એક વિકેટ ઝડપી હતી.
બેટિંગનું આમંત્રણ મળ્યા બાદ નિસાંકા અને દનુષ્કા ગુણાતિલાકાની ઓપનિંગ જોડીએ ટીમને આક્રમક શરૂઆત અપાવી હતી. જોકે, શરૂઆતમાં ભારતે કેટલાક મહત્વના કેચ પણ છોડ્યા હતા. જેના કારણે શ્રીલંકાને ફાયદો થયો હતો. આ જોડીએ પ્રથમ વિકેટ માટે 8.4 ઓવરમાં 67 રનની ભાગીદારી નોંધાવી હતી. રવિન્દ્ર જાડેજાએ ગુણતિલાકાને આઉટ કરીને ભારતને મહત્વની સફળતા અપાવી હતી. તેણે 29 બોલમાં ચાર ચોગ્ગા અને બે સિક્સર સાથે 38 રનની ઈનિંગ્સ રમી હતી.
