કેન્દ્રીય નાણાપ્રધાન નિર્મલા સીતારામને પહેલી ફેબ્રુઆરીએ તેમના કેન્દ્રીય બજેટમાં શિક્ષણ અને તબીબી હેતુઓ માટે લિબરલાઇઝ્ડ રેમિટન્સ સ્કીમ (LRS) હેઠળ વિદેશમાં મોકલવામાં આવતા રૂ.10 લાખથી વધુના નાણા પરના ટેક્સ કલેક્ટેડ એટ સોર્સ (TCS) રેટને 5 ટકાથી ઘટાડી 2 ટકા કરવાની જાહેરાત કરી હતી. સરળ શબ્દોમાં કહીએ તો ભારતના વિદ્યાર્થીઓ માટે વિદેશમાં અભ્યાસ માટે પૈસા મોકલવાનું સસ્તું બન્યું છે.
ટેક્સ કલેક્ટેડ એટ સોર્સ એ એક એવી ટેક્સ સિસ્ટમ છે, જ્યાં બેંકો અથવા અધિકૃત ડીલરો જ્યારે કોઈ વ્યક્તિ વિદેશમાં ભંડોળ મોકલે છે ત્યારે ટેક્સ વસૂલ કરે છે. લિબરલાઇઝ્ડ રેમિટન્સ સ્કીમ (LRS) હેઠળ ભારતના નાગરિકો માન્ય વ્યક્તિગત ઉપયોગ માટે દર નાણાકીય વર્ષમાં 250,000 ડોલર સુધી વિદેશમાં મોકલી શકે છે. આ વ્યક્તિ હેતુઓમાં આ શિક્ષણ, મુસાફરી, આરોગ્ય સેવાઓ, ભેટો અને રોકાણોનો સમાવેશ થાય છે.
અગાઉના નિયમો મુજબ 7 લાખથી વધુના રેમિટન્સ પર TCS લાગતો હતો. સમય જતાં વિદેશમાં રેમિટન્સની મર્યાદામાં વધારો અને તેના ટેક્સના દરમાં ઘટાડો થતો રહ્યો છે.
આ અંગેની જાહેરાત કરતા સીતારામને જણાવ્યું હતું કે હું લિબરાલાઇઝ્ડ રેમિટન્સ યોજના હેઠળ શિક્ષણ અને તબીબી હેતુઓ માટે TCS દર 5 ટકાથી ઘટાડી 2 ટકા કરવાનો પ્રસ્તાવ મૂકું છું.આ ઘટાડો ૧૦ લાખ રૂપિયાથી વધુના રેમિટન્સ પર લાગુ પડે છે અને તેમાં બેન્ક લોન આધારિત ટ્રાન્સફરનો પણ સમાવેશ થાય છે.
