વડાપ્રધાન નરેન્દ્ર મોદી બુધવારે, 17 સપ્ટેમ્બરે 75 વર્ષના થયા હતાં. વડાપ્રધાન નરેન્દ્ર મોદીના જન્મદિને અમેરિકાના પ્રેસિડન્ટ ડોનાલ્ડ ટ્રમ્પ, રશિયાના પ્રેસિડન્ટ પુતિન સહિતના વિશ્વભરના નેતાઓ શુભકામના પાઠવી હતી. પોતાના જન્મદિને વડાપ્રધાન મોદીએ મધ્યપ્રદેશના ધાર ખાતે સ્વસ્થ નારી સશક્ત પરિવાર તથા આઠમાં રાષ્ટ્રીય પોષણ મહિનાનો પ્રારંભ કરાવ્યો હતો અને અનેક વિકાસ પ્રોજેક્ટ્સ લોન્ચ કરાયા હતા. મોદીએ 10 લાખ મહિલાઓના બેન્ક એકાઉન્ટ્સમાં પ્રધાન મંત્રી માતૃ વંદના યોજના અંતર્ગત નાણાં ટ્રાન્સફર કર્યાં હતાં.
દેશભરમાં ભાજપે રક્તદાન, આરોગ્ય ચકાસણી તથા સ્વચ્છતા અભિયાનનું આયોજન કર્યું હતું. દેશભારતમાં મોદીના જન્મદિવસની ઉજવણી માટે અનેક વિકાસ અને આરોગ્યલક્ષી કાર્યક્રમોનું આયોજન કરાયું હતું. હિન્દુવાદી સંગઠન રાષ્ટ્રીય સ્વયં સેવક સંઘના સામાન્ય કાર્યકરથી શરૂ કરીને દેશના વડાપ્રધાન પદ સુધી પહોંચનારા નરેન્દ્ર મોદી વડાપ્રધાન તરીકે સતત બે ટર્મ પૂર્ણ કરનારા અને સૌથી લાંબો સમય સુધી વડાપ્રધાન પદે રહેનારા પ્રથમ બિનકોંગ્રેસી નેતા છે. વિશ્વના સૌથી લોકપ્રિય નેતાઓની યાદીમાં સ્થાન પામતા મોદીને જુલાઈમાં જારી કરાયેલી ડેમોક્રેટિક લીડર અપ્રૂવલ રેટિંગમાં ટોચનો ક્રમ અપાયો હતો.
17 સપ્ટેમ્બર, 1950એ ગુજરાતના વડનગરમાં જન્મેલાં નરેન્દ્ર મોદી, 2014માં વડાપ્રધાન બનતાં અગાઉ સતત ત્રણ ટર્મ સુધી ગુજરાતના મુખ્યપ્રધાન રહી ચુક્યાં છે. ભારતને એક આર્થિક મહાસત્તા બનાવવા માટે તેમના શાસન દરમિયાન આયુષ્યમાન ભારત યોજના, મેક ઈન ઈન્ડિયા, સ્વચ્છતા અભિયાન, ડિજિટલ ઈન્ડિયા, પ્રધાનમંત્રી ઉજ્જવલા યોજના, નોટબંધી, જીએસટી સહિતના અનેક મોટો પગલાં લેવામાં આવ્યાં હતાં. દર વર્ષની જેમ આ વર્ષે પણ ભાજપ દ્વારા વડાપ્રધાનના જન્મદિનની ઉજવણી અંતર્ગત દેશભરમાં સેવા પખવાડાનું આયોજન કરાયું હતું ગુજરાતમાં અમદાવાદ, રાજકોટ અને સુરત સહિતના શહેરોમાં નમોત્સવ કાર્યક્રમનું પણ આયોજન કરાયું હતું.
ભાજપ અને કેન્દ્ર સરકાર બુધવારથી બે ઑક્ટોબરને ગાંધી જયંતિ સુધી સમગ્ર દેશમાં સેવા પખવાડિયાની ઊજવણીના ભાગરૂપે રક્તદાન શિબિર, સ્વચ્છતા અભિયાન, હેલ્થ કેર, એક વૃક્ષ માતાને નામ સહિત જન કલ્યાણ કાર્યક્રમો અને વિકાસ પહેલ માટેના કાર્યક્રમો શરૂ કર્યાં હતાં.
