બોલીવૂડની જાણીતી કોમેડી ફિલ્મ ‘ભાગમ ભાગ’ની સીક્વલ ‘ભાગમ ભાગ 2’ના કલાકારોમાં એક મોટો ફેરફાર થયો છે. ફિલ્મનું પ્રોડક્શન શરૂ થવાની તૈયારીમાં છે, ત્યારે હવે તાજેતરના રીપોર્ટ મુજબ, ફિલ્મમાં હવે અક્ષયકુમાર અને પરેશ રાવલની સાથે મનોજ બાજપેયી જોડાશે, જ્યારે મૂળ ફિલ્મના મુખ્ય કલાકાર ગોવિંદા આ સીક્વલમાં દેખાશે નહીં.
સૂત્રો કહે છે કે, ‘2006માં રિલીઝ થયેલી મૂળ ‘ભાગમ ભાગ’ ફિલ્મમાં અક્ષયકુમાર, ગોવિંદા અને પરેશ રાવલે યાદગાર કોમેડી રોલ કર્યા હતા. હવે તેની સીક્વલ પ્રોડક્શન તરફ આગળ વધી રહી છે, ત્યારે કાસ્ટિંગમાં ફેરફાર થતો જોવા મળી રહ્યો છે.’ ‘ભાગમ ભાગ 2’નું દિગ્દર્શન રાજ શાંડિલ્ય કરશે, જેણે અનેક સફળ કોમેડી ફિલ્મોનું નિર્માણ કર્યું છે. ફિલ્મનું શૂટિંગ મુંબઈમાં ટૂંક સમયમાં શરૂ થવાની સંભાવના છે. ઘણા મહિનાઓની પ્રક્રિયાઓ બાદ હવે પ્રોડક્શન ઝડપી ગતિએ આગળ વધશે.
અક્ષયકુમારની સામે અભિનેત્રી તરીકે મીનાક્ષી ચૌધરીની પસંદગી થઇ હોવાનું કહેવાય છે. પ્રિયદર્શન દિગ્દર્શિત પ્રથમ ‘ભાગમ ભાગ’માં થિયેટર ટ્રુપની મિસએડવેન્ચર્સ પર આધારિત કહાની હતી, જેમાં સ્લેપસ્ટિક હ્યુમર અને પરિસ્થિતિ આધારિત કોમેડીનું મિશ્રણ જોવા મળ્યું હતું. ફિલ્મની સફળતાને કારણે તેની સીક્વલ છેલ્લા કેટલાંક વર્ષોમાં સૌથી વધુ આતુરતાથી રાહ જોવાતી કોમેડી પ્રોજેક્ટ્સમાંની એક બની ગઈ છે. જોકે, ‘ભગમ ભાગ 2’ની વાર્તા વિશે સત્તાવાર રીતે કોઈ વિગત જાહેર કરવામાં આવી નથી.
