પીઢ અભિનેતા જીતેન્દ્રનો એક્ટર પુત્ર અને જાણીતી ટીવી શો નિર્માત્રી એકતા કપૂરનો ભાઇ તુષાર છેલ્લે ‘કપકપી’માં જોવા મળ્યો હતો. તે હવે ‘જનાદેશ’ નામની રાજકીય થ્રિલર ફિલ્મ માટે તૈયારી કરી રહ્યો છે. જાણીતા દિગ્દર્શક પ્રકાશ ઝાની રાજકીય ફિલ્મમાં તે મુખ્ય ભૂમિકા ભજવી રહ્યો છે. આ ફિલ્મમાં તેને કેવી રીતે કામ મળ્યું તે અંગે તુષારે ખુલાસો કર્યો કે, “પ્રકાશજીએ મને ફોન કર્યો અને કહ્યું કે આ ફિલ્મમાં મારા માટે એક પાત્ર છે. આ અચાનક બની ગયું, જે લગભગ બ્રહ્માંડમાંથી મળેળાં એક સંકેત જેવું હતું.”
વર્ષોથી કોમિક અને હળવી ભૂમિકા ભજવીને બોલીવૂડમાં પોતાનું સ્થાન બનાવ્યા પછી, તુષાર જનાદેશને તેની ગતિમાં નવા પરિવર્તન તરીકે ધ્યાનમાં લઇ રહ્યો છે. તે કહે છે કે, “કોઈપણ ઇમેજથી અલગ થવાનો નિર્ણય ઇરાદાપૂર્વક નહોતો” આવું કહેતા તુષારે કોમેડી ફિલ્મથી અલગ ફિલ્મ કરવા વિશે વાત કરી. તુષારે કહ્યું, “હું પોલિટિકલ થ્રિલર ફિલ્મ કરવા ઇચ્છતો હતો, ખાસ કરીને પ્રકાશ ઝા જેવા વ્યક્તિ સાથે, જે આ શૈલીની ફિલ્મમાં શ્રેષ્ઠ છે. હું તેમના કામનો પ્રશંસક રહ્યો છું અને હું મારી જાતને ભાગ્યશાળી માનું છું કે મને એક અભિનેતા તરીકે એક નવી જગ્યા શોધવાની તક મળી.”
પોતાની તૈયારી વિશે તુષારે શેર કર્યું, “પ્રકાશજી અને હું નાના-વર્કશોપ માટે મળી રહ્યા છીએ જેથી પાત્રનો અભ્યાસ કરી શકાય અને સમજી શકાય કે તે મને ભૂમિકામાં કેવી રીતે જુએ છે અને તે મારી પાસેથી શું અપેક્ષા રાખે છે.” ભૂમિકા વિશે પૂછવામાં આવતા, તુષારે સ્પષ્ટતા કરી કે તે કોઈ એક વ્યક્તિનું સીધું પ્રતિનિધિત્વ નથી. “આ એક કાલ્પનિક પાત્ર છે, જે વાસ્તવિક જીવનના વ્યક્તિત્વ પર આધારિત નથી, પરંતુ તે વાસ્તવિક લોકો અને સાચી ઘટનાઓથી પ્રેરિત છે. તેનો વિચાર તેને અધિકૃત અને વિશ્વાસપાત્ર રાખવાનો છે અને હું તેના પર કામ કરી રહ્યો છું.”
