ફલોરિડાની પોલીસે ક્રુઝ પર એક છોકરીની છેડતી કરવાના આરોપસર ૭૩ વર્ષના એક ગુજરાતીની ધરપકડ કરી છે. રાજેન્દ્ર શેઠ નામના આ શખસ પર રોયલ કેરેબિયન ક્રુઝ પર એક છોકરી સાથે અભદ્ર હરકતો કરવાનો આરોપ છે. બ્રેવર્ડ કાઉન્ટી શેરિફ ઓફિસના જણાવ્યા અનુસાર સોમવારે પોલીસને આ ઘટના વિશે જાણ થઈ હતી. પોલીસનું કહેવું છે કે એકસપ્લોરર ઓફ ધી સીઝ નામનું ક્રુઝ ઈન્ટરનેશનલ વોટર્સ પર હતું ત્યારે રાજેન્દ્ર શેઠે આ કથિત કૃત્યને અંજામ આપ્યો હતો.
આ કેસની અરેસ્ટ એફિડેવિટને ટાંકતા કેટલાક મીડિયા રિપોર્ટ્સમાં જણાવાયું છે કે પોલીસે વિકિટમને શોધ્યા બાદ તેની સાથે વાત કરી હતી, વિકિટમે એવો દાવો કર્યો હતો કે ગયા અઠવાડિયે તે ક્રુઝના ફલો રાઈડર એરિયામાં હતી ત્યારે કોઈ અજાણ્યા વૃદ્ધે તેની પાસે આવી વાત કરવાનો પ્રયાસ કર્યો હતો. પોલીસનું કહેવું છે કે મૂળ મુંબઈના રાજેન્દ્ર શેઠે છોકરી સાથે વાતચીત દરમિયાન તેના થાપા પર હાથ ફેરવ્યો હતો અને આવું તેમણે અનેકવાર કર્યું હતું, તે વખતે વિકિટમે ટુ પીસ બાથિગ સ્ટૂટ એટલે કે બિકિની પહેરી હતી.
આ કેસની તપાસ દરમિયાન પોલીસે ક્રુઝ શિપના સર્વેલન્સ ફુટેજ પણ ચેક કર્યા હતા જેમાં રાજેન્દ્ર શેઠે આ હરકત કરી હોવાની પુષ્ટિ થયા બાદ તેની ધરપકડ કરવામાં આવી હતી. અરેસ્ટ એફિડેવિટમાં એવું પણ જણાવાયું છે કે રાજેન્દ્ર શેઠે છોકરીને ગંદી રીતે સ્પર્શ કર્યા બાદ હોબાળો થતાં રોયલ કેરેબિયન સિકયોરિટીએ તેમની પૂછપરછ કરી હતી અને સિકયોરિટી સ્ટાફના બોડી કેમેરામાં તેમણે આ હરકતનો સ્વીકાર કર્યો હોય તેવા દ્રશ્યો પણ કેપ્ચર થયા હતા જેમાં તેમણે કબૂલ્યું હતું કે પોતે વિકિટમને બેકસાઈડ પર સ્પર્શ્યા હતા.
રાજેન્દ્ર શેઠ પર બદઈરાદા સાથે માઈનોરને સ્પર્શ કરવાનો ચાર્જ લગાવવામાં આવી શકે છે. તેમના પર હાલ ૩૫ હજાર ડોલરના બોન્ડ મૂકવામાં આવ્યા છે અને તેમને માર્ચ ૧૨ના રોજ કોર્ટ સમક્ષ હાજર કરવામાં આવશે. પોલીસ રેકોર્ડ્સ અનુસાર ફેબ્રુઆરી ૧૬ના રોજ પોર્ટ કનેવરલમાંથી રાજેન્દ્ર શેઠની ધરપકડ કરવામાં આવી હતી.
ફલોરિડાના કાયદા અનુસાર આવા કેસમાં જો વિકિટમની ઉંમર ૧૮ વર્ષથી ઓછી હોય તો ગુનો સાબિત થવા પર આરોપીને ૧૫ વર્ષ સુધીની જેલ અને દસ હજાર ડોલરનો દંડ થઈ શકે છે. આ ક્રાઈમ સેકન્ડ ડિગ્રી ફેલોનીની કેગેટરીમાં આવે છે, મતલબ કે તે ગંભીર ગુનો છે અને જો આરોપી પર ફલાઈટ રિસ્ક હોય તો તેના માટે બોન્ડ પર છૂટવું પણ મુશ્કેલ થઈ શકે છે.
રાજેન્દ્ર શેઠ વિઝિટર તરીકે અમેરિકા ગયા હતા કે પછી તેઓ ત્યાં કોઈ સ્ટેટસ પર રહે છે તેની કોઈ વિગતો પોલીસે શેર નથી કરી, તેમના એડ્રેસમાં માત્ર મુંબઈનો જ ઉલ્લેખ કરવામાં આવ્યો હોવાથી તેઓ ટુરિસ્ટ હોય તેવી શકયતા નકારી શકાય તેમ નથી. જોકે, તેમના પર જે ચાર્જિસ લગાવાઈ શકે છે તે ખૂબ જ સિરિયસ હોવાથી ૭૩ વર્ષના આ ગુજરાતીની મુસીબત વધી શકે છે.
