અમેરિકામાં સૌથી વધુ શિક્ષિત ધાર્મિક સમુદાયમાં હિન્દુઓ પ્રથમ ક્રમે અને યહૂદીઓ બીજા ક્રમે છે. દસમાંથી સાત હિન્દુઓ (૭૦ ટકા) અને ૬૫ ટકા યહૂદીઓ પાસે સ્નાતકની ડિગ્રી કે તેથી વધુ ઊંચી ડિગ્રી હાંસલ કરેલી છે. આની સામે અમેરિકાના કુલ પુખ્ત વયના લોકોમાં આ પ્રમાણ માત્ર 35 ટકા છે. અમેરિકામાં વિવિધ ધર્મના લોકોમાં શિક્ષણ અંગેના પ્યૂ રિસર્સ સેન્ટરના વિશ્લેષણમાં આ વિગતો બહાર આવી હતી.
વોશિંગ્ટન સ્થિત ગ્લોબલ થિંક ટેંક પ્યૂ રિસર્ચ સેન્ટરના આ રિપોર્ટે માત્ર હિન્દુઓની ઉચ્ચ શૈક્ષણિક યોગ્યતા જ નથી દર્શાવી પરંતુ અમેરિકાના આર્થિક અને સામાજિક વિકાસમાં તેમની મહત્વપૂર્ણ ભૂમિકા પર પણ પ્રકાશ પાડયો છે. અમેરિકામાં રહેતા હિન્દુઓની શૈક્ષણિક યોગ્યતા ત્યાંની રાષ્ટ્રીય સરેરાશ કરતાં બમણી છે.
પ્યૂ રિસર્ચ સેન્ટરે કહ્યું હતું કે, ૨૦૨૩-૨૪ રિલિજિયસ લેન્ડસ્કેપ સ્ટડીના આ પરિણામો અમેરિકામાં ધર્મ અને જાહેર જીવન પર કરાયેલા અત્યાર સુધીના સૌથી મોટા અને વ્યાપક સર્વેક્ષણોમાંથી એક છે. આ ડેટા અમેરિકન સમાજમાં વિવિધ સમુદાયોની બદલાતી સ્થિતિ અને તેમની શૈક્ષણિક સિદ્ધિઓને દર્શાવે છે.
આ રિપોર્ટમાં એવું પણ સામે આવ્યું છે કે સરેરાશ કરતાં વધુ ઉચ્ચ શિક્ષણ મેળવનારા અન્ય ધાર્મિક જૂથોમાં મુસ્લિમ, બૌદ્ધ અને ઓર્થોડોક્સ ખ્રિસ્તીઓનો સમાવેશ થાય છે. આ ત્રણેય સમુદાયોમાં પણ શિક્ષણ પ્રત્યે ઘણી જાગૃતિ જોવા મળી છે જ્યાં પ્રત્યેક ૧૦માંથી ૪થી વધુ વયસ્કો પાસે ઓછામાં ઓછા બેચલરની ડિગ્રી છે. આ રિપોર્ટ અમેરિકામાં વિવિધ ધાર્મિક જૂથો વચ્ચે શિક્ષણમાં મોટું અંતર દર્શાવે છે.
