બિલિયોનેર મુકેશ અંબાણીની રિલાયન્સ ઇન્ડસ્ટ્રીઝને વેનેઝુએલાના ક્રૂડ ઓઇલની સીધી ખરીદી કરવા અમેરિકાનું જનરલ લાઇસન્સ મળ્યું હોવાનું સૂત્રોને ટાંકીને મીડિયા અહેવાલમાં જણાવાયું હતું. આનાથી જામનગરમાં દેશની સૌથી મોટી રિફાઇનરી ધરાવતી કંપની ડિસ્કાઉન્ટ ભાવે હેવી ક્રૂડ ઓઇલની ફરી આયાત શરૂ કરી શકશે અને તેના માર્જિનમાં વધારો થશે. અમેરિકાના આ લાઇસન્સથી રશિયા પરની ભારતની નિર્ભરતામાં પણ ઘટાડો થશે.
અમેરિકાના પ્રતિબંધોનું ઉલ્લંઘન કર્યા વગર વેનેઝુએલાથી ક્રૂડ ઓઇલની સીધી ખરીદી કરવા માટે રિલાયન્સ સહિતની આંતરરાષ્ટ્રીય એનર્જી કંપનીઓને યુએસ જનરલ લાઇસન્સ મળ્યું છે. ગયા મહિને મિલિટરી ઓપરેશન હાથ ધરીને વેનેઝુએલાના પ્રેસિડન્ટ નિકોલસ માદુરોને અમેરિકા લાવવામાં આવ્યા હતાં. આ પછી વેનેઝુએલાના ક્રૂડ ઓઇલ પર અમેરિકાનું નિયંત્રણ છે. હવે અમેરિકાએ વેનેઝુએલાના એનર્જી ઇન્ડસ્ટ્રી પરના નિયંત્રણો હળવા કર્યાં છે.
અમેરિકાએ અત્યાર સુધી ટ્રેડરો મારફત વેનેઝુએલાના તેલના વેચાણની મંજૂરી આપી હતી, પરંતુ હવે જનરલ લાઇસન્સ ધરાવતી કંપની સીધી ખરીદી કરી શકશે. 2019-20માં અમેરિકાએ નિકોલસ માદુરોની સરકાર પર પ્રતિબંધો લાદ્યા તે પહેલાં રિલાયન્સ વેનેઝુએલાના ક્રૂડ ઓઇલની નિયમિત ખરીદદાર કંપની હતી.. 2024માં અમેરિકાએ પ્રતિબંધો કામચલાઉ રાહત આપી ત્યારે તેને ખરીદી કરી હતી. આ પછી ટ્રેડરો મારફત વેનેઝુએલાના તેલનો પ્રવાહ ફરી શરૂ થયો ત્યારે રિલાયન્સે વિટોલ પાસેથી 20 લાખ બેરલ ક્રૂડ ખરીદ્યું હતું. આ વર્ષે ઇન્ડિયન ઓઇલ અને હિન્દુસ્તાન પેટ્રોલિયમ જેવી સરકારી કંપનીઓએ પણ વેનેઝુએલાના ઓઇલની ખરીદી કરી હતી.
ગયા સપ્તાહે અમેરિકાના પ્રેસિડન્ટ ડોનાલ્ડ ટ્રમ્પે જણાવ્યું હતું કે ભારત સાથે અમેરિકાના વેપાર કરાર બાદ વડાપ્રધાન નરેન્દ્ર મોદી રશિયન તેલ ખરીદવાનું બંધ કરવા તથા અમેરિકા અને સંભવતઃ વેનેઝુએલા પાસેથી વધુ તેલ ખરીદવા સંમત થયા છે. આ કરારને કારણે અમેરિકાએ રશિયન તેલની આયાત માટે ભારતીય માલ પર લાદવામાં આવેલા 25 ટકા વધારાના ટેરિફને પાછો ખેંચી લીધો છે. સૂત્રોએ જણાવ્યુ હતું કે રશિયા પાસેથી આયાતમાં ઘટાડો થઈ રહ્યો છે ત્યારે ભારતને ક્રૂડ ઓઇલના સ્રોતમાંથી વિવિધતા લાવવામાં મદદ મળશે.
