સાઉથ ઈસ્ટ હિન્દુ એસોસિએશન (સેહા) દ્વારા સાઉથ ઇસ્ટ લંડનના વુલીચના એન્જલસી મ્યુઝ સ્થીત શ્રી રામ મંદિર ખાતે મહાશિવરાત્રી ઉત્સવ ઉજવાયો હતો. મંદિર અને સંસ્થાની સેવા, શ્રદ્ધા અને સામુદાયીક એકતાના 50 વર્ષ પૂર્ણ થયા હોવાથી આધ્યાત્મિક રીતે ઉત્થાન આપતો મહાશિવરાત્રી ઉત્સવ એક ઐતિહાસિક સીમાચિહ્નરૂપ બન્યો હતો.
તા. 15 ફેબ્રુઆરીના રોજ આ ઉજવણી પ્રસંગે ભક્તો, પરિવારો, સ્વયંસેવકો અને સમુદાયના નેતાઓએ ભક્તિ, ધ્યાન અને ભાવનાત્મક સંગીતથી ભરેલા વાતાવરણમાં ભગવાન શિવનો પરંપરાગત ધાર્મિક અભિષેક, પૂજા કરવામાં આવી હતી. શ્રી પશુપતિનાથ મંદિર, લંડનના સહયોગથી આયોજિત કાર્યક્રમમાં ભક્તોએ મોટી સંખ્યામાં ઉપસ્થિત રહી મહાપ્રસાદનો લાભ લીધો હતો.
આ પ્રસંગે સાઉથ ઈસ્ટ હિન્દુ એસોસિએશન (સેહા)ના 50 વર્ષ પૂર્ણ થતા હોવાથી પ્રાસંગિક પ્રવચનો કરવામા આવ્યા હતા અને ભાવિ કાર્યક્રમો ઘડી કાઢ્યા હતા. સેહાની 50 વર્ષની સફરને દર્શાવતું ભાવનાત્મક પ્રેઝન્ટેશન ઉપસ્થિત સૌને સ્મૃતિઓમાં લઈ ગયું હતું. આ પ્રસંગે મંદિરનો પાયો નાંખવામાં સહકાર આપનાર અને યોગદાન આપનારાઓનું સન્માન કરવામાં આવ્યું હતું.
